Yudansa di un pa otro entre islanan ruman ta nesesario

Manera ya ta konosí, Pais ruman Kòrsou ta pasando den momentunan hopi fèrfelu ku e situashon di Covid-19 ku a sali kompletamente for di man. Debí na e kantidat di persona ku a keda hòspitalisá e último dianan, a pone ku a yega na e kantidat máksimo di pashènt ku por duna kuido den hòspital ‘Curaçao Medical Center’ (CMC). Tin un pashènt di Boneiru tambe den hòspital na Kòrsou. E Pais a manda pidi islanan den Reino yudansa pa fasilitá aparatonan respiratorio debí ku ta premirá ku mas hende lo keda hòspitalisá den e dianan benidero i Kòrsou mes no tin sufisiente aparato. Boneiru tin sufisiente aparato na e momentunan aki i a koperá ku 10 aparato, Sint Maarten tambe lo koperá ku 10 aparato mientras nan a manda pidi Hulanda 20 aparato. Awe mainta, un avion ‘ambulance flight’ stashoná i ‘standby’ na Boneiru si dado kaso mester transportá kualke pashènt pa otro Pais pa risibí tratamentu médiko mas avansá, a sali for di Boneiru rumbo pa Kòrsou, pa buska un beibi ku a nase prematuro i transporté pa Colombia. Esaki ta ilustrá e laso fuerte komo ruman ku tin entre e islanan ku tei pa otro den tur momentu.