E Barku patruyero di Marina Zr.Ms. Friesland, ku na e momentunan aki ta keda desplegá den region Karibe ku tareanan di Wardakosta, a interseptá den oranan trempan di awe mainta un transporte di droga na parti sùit di Kòrsou.
E asina yama ‘go-fast’ a keda deskubrí pa Wardakosta riba un ruta konosí di kontrabanda, despues di kua Friesland a keda aktivá. Ku e barku rápido di intersepshon, FRISC, a logra enkontrá e boto. Despues di disparonan di atvertensha e pasaheronan a disidí di tira e paketenan di droga den laman. E paketenan a ser saká for di laman i a pone esakinan a bordo di e FRISC, pa despues nan keda entregá na barkunan di patruya di Wardakosta. E tres pasaheronan a logra hui. Un total di 224 kilo di droga a keda saká for di den laman i konfiská.
Zr.Ms. Friesland ta aktivo den Region Karibe desde yanüari 2022, komo barku patruyero i ta kondusí operashonnan alternativo antidroga, sosteniendoWardakosta di Karibe Hulandes.
