Awe dia 16 di september den un reunion publico a trata y aproba credencialnan di 8 candidato pa parlamentario. Ta parse cu awor Aruba tin 29 Parlamentario si esnan cu lo bira minister ainda no a nenga nan posicion como parlamentario.
Ta urgente trata credencialnan di esnan cu lo kier bira minister pa cumpli cu ley. Sinembargo e reunion ey no a ser yama ainda.
Dia 14 di september, riba e di dos diamars di luna di september, manera indica den nos Constitucion, tabata apertura di anja Parlamentario nobo 2021-2022. Gobernador di Aruba a duna acto di presencia na Parlamento y a duna su discurso den cual el a presenta e maneho di gobierno pa pa e proximo anja. Prome cu dia 1 di september gobierno lo mester a entrega e presupuesto di pais Aruba pa e anja benidero. Ta un lastima segun Wyatt-Ras cu gobierno no a cumpli cu locual Constitucion ta indica, ni e anja aki ni durante nan gobernacion, desde anja 2017. E eleccion dialuna, dia 13 di september, di e presidente y vice-presidente di Parlamento tampoco no a bai manera cu mester a bai. Di antemano tabata conoci ken lo bira e presidente y vice-presidente, pasobra gobierno a anuncia esaki, locual ta muestra di un stempelparlement. Pesey mes fraccion di AVP hunto cu otro fracionnan den oposicion a vota en blanco.
Ta obvio cu den Parlamento aki gobierno lo dicidi y manda riba e fraccionnan cu ta sosten’e.
Repasando e trabounan di Parlamento den e anja Parlamen tario 2020-2021 por conclui cu ministernan di Gabinete Wever-Croes no a contesta preguntanan di Parlamentarionan lo suficiente. Di e cantidad di 1238 pregunta cu miembronan di Parlamento a haci solamente 459 a ser contesta. Esaki ta 37% so. Wyatt-Ras mes a haci 141 pregunta na diferente minister y solamente 65 a ser contesta, locual ta 46 % so. Tin 2 minister cu no a contesta ningun pregunta por escrito, esta Ruiz-Maduro y Romero. Aki por conclui cu tin falta di transparencia y respet pa Parlamento, locual ta trece democracia na peliger.
Durante e anja cu a pasa por a nota alabes cu reunionnan publico cu a ser pidi no tabata wordo yama. Issuenan importante a ser trata den Bijeenkomst y no den Reunion Publico. E diferencia ta cu den un Bijeenkomst por haci pregunta informativo solamente den un tempo corto, mientras cu den Reunion Publico cada Parlamentario por tin 20 minuut den prome tanda y 10 minuut den segunda tanda pa haci pregunta of cuestiona gobierno y tambe por presenta mocionnan y den caso ta trata un ley por presenta amienda.
Wyatt-Ras y su fraccion ta condena cu gobierno no ta tuma Parlamento na serio y cu e presidente di Parlamento tabata complaciente cu Gobierno y no a obliga gobierno pa contesta preguntanan y preocupacionnan di Parlamentarionan y nos pueblo. Un punto di atencion ta keda e hecho cu gobierno mester duna cuenta na Parlamento di loke e ta haci. Mester responsabilisa. Den caso esaki no sosode nos democracia ta sigui decae. E ora nos no por papia mas di e poder di nis pueblo. Wyatt-Ras ta spera cu e promesanan di e politiconan cu lo tuma rienda di nos pais por ser cumpli. Ta urgente cu tin respet pa nos pueblo y pa Parlamento.