Parlamentario Calmes a manda un karta pa Minister di VVRP konteniendo vários pregunta rondó e asina yamá “Grond & Vastgoedbedrijf” (GV). Propósito dje karta ta pa trese klaridat kiko ta bai pasa ku pueblo su edifisionan, su terenonan i su playanan na Kòrsou i Klein Kòrsou.
Inisialmente hopi a kere ku e GV lo a bin yuda ku e “achterstand” grandísimo ku tin na ROP i Domeinbeheer pa tereno. Sinembargo rumornan ta insistí ku GV ta bai bira e outoridat enkargá ku atministrashon i benta di edifisionan, terenonan i hasta playanan di pueblo.
Calmes a puntra e Minister pa risibí tur informashon riba ròl di e GV ku ta bai wòrdu lanta. Pa Calmes ta kontroversial si ta bai bende edifisionan miéntras Gobièrnu a paga Naf 64 mion den último 4 aña pa hür di kasi 32 lokalidat. Gobiernu mes tin 110 lokalidat. Maske ku “Groeiakkoord” a wòrdu deskontinuá unilateralmente, dor di Sr. Knops, e proyekto di “GV” si a kontinuá. P’esei Calmes ke opten’é datos di ken ta forma parti dje proyekto i kiko te outoridat dje GV. Tambe Calmes kier klaridat kon Gobièrnu ke outorisá GV pa bende terenonan, edifisionan i nos playanan. Calmes ta konvensí ku esaki ta un dje motibunan ku Gobièrnu a skonde e lei di Reino di COHO. Dje forma aki Gobièrnu por krea espasio pa burla di nos Lei nan lokal i usa Lei di Reino pa bende propiedat di pueblo. Tin vários opshon pa desaroyá sin bende. Calmes: “Ami ta kontra pa bende playa”.
Ta straño ku no tin fondo pa proyektonan sosial, pero si tin sèn pa buska “consultants” karu miéntras trahadónan mes a informá Calmes ku VVRP tin ámtenar mihó kapasitá. P’esei Calmes a pidi e Minister pa spesifiká tur informashon finansiero. Presupuesto 2021 ta limitá na informashon riba e GV aki hasiendo e falta di transparensia aun mas grandi.
