Riba 13 februari ultimo Aduana a controla tres pasahero na aeropuerto internacional Reina Beatrix, kendenan a yega Aruba cu un avion priva desde Mexico. Nan tabatin un total di 22.000 dollar cu nan. E sospecho ta cu nan a parti e cen aki entre nan pa keda bao di e limite di mester meld. E pasaheronan a duna declaracionnan contradictorio y no por a splica e provenencia di e placa. Nan a wordo entrega na polis y despues di interogacion, a tuma distancia di e placa. E caso penal a keda termina y e sospechosonan lo no wordo persigui mas.
E placa aki ta cay directamente pa Criminaliteitsbestrijdingsfonds. Placanan di e fondo aki ta wordo usa pa bringa criminalidad. Afpakteam Integral di Aruba kier aporta visiblemente na esaki.
Afpakteam, cu ta traha na bringa criminalidad financiero economico, ta consisti di e partnernan Ministerio Publico, Cuerpo Policial di Aruba, Aduana, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht, Meldpunt (Meldpunt Ongebruikelijke Transacties) y RST (Recherche Samenwerkingsteam). Por contacta Afpakteam via afpakteam@kparuba.com of via tiplijn 11141.
