Relaciona cu Celebracion Dia di San Juan – Dera Gay 2022
Minister Xiomara Maduro:
Un invitacion pa scol basico participa den ‘Kibra Coco Edicion Dera Gay’
Manera tur aña pa e celebracion di Dianan Nacional y Fiestanan Cultural Tradicional, Ministerio di Cultura, hunto cu Departamento di Cultura y Comision Celebracion Dianan Nacional ta prepara material informativo y educativo pa nos muchanan di scol preparatorio y basico.
Video “Celebracion Fiesta di San Juan Dera Gay 2022”:
Pa e celebracion di Fiesta di San Juan Dera Gay 2022 a prepara e aña aki pa scolnan basico y scol preparatorio un produccion digital cu lo tin como titulo “Celebracion Fiesta di San Juan Dera Gay 2022”. E video aki lo wordo manda pa tur scol pa nan por download of por download esaki for di e youtube channel di Minister Xiomara Maduro. Cu e video aki tur alumno di scolnan preparatorio, basico y enseñansa special tin informacion digital y na forma innovativo. E video aki ta un material educativo pa docentenan y tambe ta un preparacion pa tur alumno di scol basico pa e Competencia Nacional ‘Kibra Coco’ (Quiz), edicion Dera Gay. Un gradicimento ta bay na Ministerio di Cultura, Comision Celebracion Dianan Nacional, Comision di maestronan, Sr. Levy Geerman, Departamento di Cultura, Archivo Nacional Aruba, Telearuba y SETAR pa nan cooperacion pa por haci e bunita produccion educativo aki posibel.
Si tin pregunta por manda esaki na ccdn@cultura.aw of yama na Departamento di Cultura na 582- 2185. Minister di Cultura Xiomara Maduro ta desea tur scol basico hopi exito den e Competencia “Kibra Coco, Edicion Dera Gay”.
