Recientemente 15 trahador pedagogico di diferente centronan di cuido y guia di mucha a termina e curso di Prome Asistencia/CPR y Seguridad paden y pafo e Centro di Cuido di mucha. Fundacion pa nos Muchanan (FPNM) a organisa e training den colaboracion cu Rode Kruis, Brandweer Aruba y Jeugdgezondheidszorg. E training ta consisti di un Diamars anochi y un Diasabra intensivo unda a train con pa practica Prome Asistencia CPR.
E parti di “Prome Asistencia CPR” tabata na encargo di Rode Kruis y cada Trahador Pedagogico a finalisa e parti practico exitosamente y a ricibi nan carnet cu ta valido pa 2 aña.
Diamars anochi a ricibi informacion di seguridad paden y pafo di nan Centro di Cuido y Seguridad di baby enfocando riba e tema di drumimento safe.
“Seguridad paden y pafo di bo centro” tabata na encargo di FPNM y “Seguridad di Baby” tabata na encargo di Jeugdgezondheidszorg.
Alabes a enfatisa, entre otro, ariba e importancia di prevencion di candela, plan di evacuacion y con pa haci uzo di un brandblusser cu a ser duna pa Brandweer Aruba.
Un curso exitoso tras di lomba caminda FPNM ta gradici Brandweer Aruba, Rode Kruis y Jeugdgezondheidszorg pa nan tremendo instruccion y alavez ta felicita cada trahador pedagogico, deseando nan exito den nan trabou cu mucha!
