Sclavitud ta un topico cu mester papia riba dj’e. Otro aña ta cumpli 160 aña di Abolicion di Sclavitud den Reino Hulandes. Hulanda ta prepara pa brinda despensa pa e actonan haci contra dignidad humano haci den nos historia comparti den Reino Hulandes. Na e momentonan aki tambe denter di Reino ta sondea na ki manera lo por brinda un reparacion pa e daño haci. Na Aruba e topico di sclavitud no ta ser papia hopi di dj’e y pesey un dialogo a wordo habri cu algun grupo di interes, ‘stakeholders,’ cu e meta pa conscientisa comunidad riba e topico di ‘Sclavitud na Aruba.’
Prome dialogo pa yega na un agenda pa conscientisa
Siman pasa diaranson, Minister Maduro di Cultura a invita un grupo di interes pa dialoga riba e topico di ‘Sclavitud na Aruba’ na Archivo Nacional di Aruba. E dialogo a wordo guia pa sr. Luc Alofs y modera pa sra. Yolanda Richardson. E intencion di e dialogo ta, pa hunto cu diferente grupo di interes haya presenta un agenda di actividad den cual ta brinda informacion y ta crea consciencia riba kico a pasa y kico por wordo haci pa evita cu e historia colonial di sclavitud por keda ripiti su mes den nos manera di trata cu otro den Reino Hulandes. E interes den e dialogo tabata grandi y hopi a comenta cu na Aruba e topico di sclavitud no ta ‘biba’ pa motibo di falta di informacion y e hecho cu sclavitud ta un tema cu ta wordo considera uno taboe y fuerte.
Hulanda kier brinda despensa pa e daño haci
Durante e prome dialogo a trece dilanti e intencion di e mandatarionan na Hulanda pa brinda despensa y reparacion pa e actonan haci contra dignidad humano durante e periodo di e negoshi di sclavitud den Reino Hulandes. Pa hopi esaki ta un sorpresa y ta puntra nan mes dicon despues di casi 160 aña cu a aboli sclavitud den Reino Hulandes, kier bin cu un despensa awor. Minister Maduro a splica cu e topico aki ta recientemente a wordo poni riba e agenda di reunion cu Secretario di Estado Van Huffelen. E necesidad pa pone e topico riba agenda ta surgi despues cu e ‘Adviescollege Dialooggroep Slavernijverleden’ a saca su rapport ‘Ketenen uit het verleden’ den cual ta conseha Estado Hulandes pa acepta cu e negoshi di sclavitud tabata contra dignidad humano, pa ofrece despensa pa esaki denter di Reino Hulandes y na Surnam, y pa brinda un reparacion pa e daño haci. Minister Maduro a splica e grupo di interes, cu pa compronde y acepta un despensa, ta importante pa dialoga y brinda informacion prome na Aruba riba e topico di sclavitud. Ta pa e motibo aki hunto cu e grupo di interes lo kier yega na un agenda cu actividad pa conscientisa comunidad. Na final di e dialogo, Minister Maduro a expresa cu pa su persona ‘een welgemeend excuus is altijd bonbini.’ Un despensa sincero semper ta bonbini. Prome nos tin cu acepta cu despensa ta wordo brinda ora ya no ta haci e mesun erornan. Sinembargo, tanten nos historia reciente den Reino ta mustra rasgo di trato contra dignidad. E pregunta ta si Reino ta cla pa locual kier pidi despensa p’e. Pa e motibo aki e dialogo riba e topico di sclavitud ta sumamente relevante y importante.
