Rekonosementu na luna di aprel pa kuater wéspet mas komo embahador di Boneiru

Na luna di aprel último Tourism Corporation Bonaire (TCB) a duna rekonosementu na kuater wéspet komo embahador di Boneiru den kategoria di bròns, plata i oro. 

Gardner Robinson prosedente di Merka i ku ta bishitando Boneiru pa 10 aña, ta un di e bishitantenan ku a risibí un distinshon. Sr. Robinson a risibí su feneta bròns na e okashon aki. 

E pareha Jochen i Elke Stroebele di Alemania tambe a keda rekonosé pa motibu ku nan ta bishitando Boneiru pa 15 aña kaba, i nan a risibí un feneta di plata.

Stephen Loque a haña un sorpresa na momentu ku Sr. Cliff Frans, un bon amigu di dje a present’é komo embahador di Boneiru ya ku e ta bishitando Boneiru pa 23 aña largu. Na e okashon aki a otorg’é su feneta di oro.

Sra. Helen Mercera a hasi entrega di feneta i sertifikado na e embahadornan nobo i a gradesí nan pa e echo ku nan ta skohe Boneiru komo nan destinashon di vakansi.