E siman aki a tuma luga un otro tayer organisa pa A.T.A. y APA pa e industria crucero. Den cuadro cu Dia Internacional di Turismo, Ministerio di Turismo, APA y A.T.A. a gradici, felicita y informa esnan presente. Presente na e ocasion tabata Minister di Turismo, CEO di A.T.A., CEO di APA, socionan di e industria di turismo y e ekipo di A.T.A. Durante e simposio, Ronella Croes entre otro a hiba palabra y a comparti resultadonan anticipa pa 2023, planes y strategian primordial pa 2024 y a refleha riba e contribucion di e industria crucero pa economia di Aruba.
2023
Te cu na augustus 2023 Aruba a ricibi 548,480 bishitante crucero, compara cu 329,645 bishitante crucero cu a yega Aruba den e mesun periodo na aña 2022 – representando pues un crecemento di 66.4%. Cantidad di cruise calls te cu augustus a aumenta na 206 compara cu 184 na 2022, marcando pues un crecemento di 12%. E industria crucero ta sigui recupera y ta anticipa un recuperacion total pa fin di 2023.
Economic Impact Cruise Sector
Aparte di midi e cantidad di bishitante cu ta yega Aruba riba crucero, A.T.A. ta midi tambe e contribucion di e industria crucero pa economia di Aruba. For di un estudio conduci na aña 2018 por nota cu cada bishitante crucero ta laga un averahe di $122 atras durante nan bishita. Si tira un bista riba loke e industria crucero ta produci den su totalidad, aplicando e patronchi di gasto aki, por menciona cu $125,259,234 lo por ta e impacto economico e anja aki. Ta un cantidad significante pa economia di Aruba. Pronto lo actualisa e informacion aki. Ta anticipa cu e bishitante crucero ta gasta mas cu na 2018.
Strategia 2024 + Satisfaction
Pa 2024, ta pronostica cu e sector crucero lo por ta sperando casi 900,000 pasahero. E demanda aki ta resultado di bon colaboracion cu socionan comercial (manera FCCA y CLIA) y bon colaboracion cu destinacionnan/puertonan den Caribe. No obstante e crecemento aki, pa A.T.A. ta keda importante pa mantene e enfoke riba crecemento sostenibel y duradero den e sector aki. Door di mantene e modelo di turismo di ‘balor halto y impacto abou’ (high value, low impact).
Estudionan / investigacionnan actual ta indica cu e grado di satisfaccion y di recomenda Aruba ta halto. Unda mester mas atencion ta riba e probabilidad di regresa sea cu barco of pa un estadia di mas cu un dia. Pa logra mantene e nivel di satisfaccion, A.T.A. ta traha estrechamente cu partnernan den industria pa mehora y diversifica nos producto turistico cu na final di dia ta impacta e experencia di bishitante y stimula nan gasto riba nos isla. Entre otro, ta inverti den proyectonan manera e Masterplan di Seroe Colorado, rutanan di Mountain Bike, maneho di beach, mehoracion di maneho di fluho di bishitante y e ‘Aruba Quality Seal’. Tambe ta duna extra atencion na e parti di educacion y calidad di experencia – algo cu A.T.A. a bin ta haciendo caba. Relaciona cu esaki, mester menciona cu e ekipo di A.T.A. a organisa e anja aki e tayer enfocando riba e temanan di “Product Development” y “Service Excellence: WOW Edition”.
A.T.A. ta gradici y aplaudi esnan cu a haci bon uso di e oportunidad di sigui e tayer di 2 dia.
