MAN-PIN ku mas akshon pa kombati kosto di bida haltu
Den e algu mas ku dos luna ku MAN-PIN ta forma parti di e parlamento di Kòrsou, nos a demostrá ku ta ora pa akshon i no promesa bashí. Despues di a haña aprobashon di Parlamento kompletu pa e adaptashon di sueldo mínino pa esnan di 18 pa 20 aña i sòru pa porfin tin akshon pa kobradónan di AOV su penshun keda indeksá, MAN-PIN a habri djaluna 21 di yüli ku entrega di otro inisiativa di e partido: Ahuste di onderstant na subida di kosto di bida. E lei ku e frakshon a hasi entrega na Parlamento ta duna un base fuerte pa anualmente adaptá onderstant na oumento di kosto di bida (inflashon) i no laga esei ta mas na merset di e gobièrnu.
Ta konosí ku ekonomia a bin ta krese for di 2021, danki na e base fuerte ku MAN i PIN a pone nèt prome ku e pandemia. Sinembargo, e pandemia a trese mas pobresa, sigur pa esnan mas vulnerabel, ya ku preis di komunstibel, produkto pa higiena personal i otro produkto i servisionan di promé nesesidat a subi drastikamente. Pa e kobradó di onderstant e subida di preis ei ta resultando di ta aun mas den su kontra. Apesar ku gobièrnu ta ofresé supsidio pa hür, transporte pa skol i subsidio di awa i koriente, e kobradó di onderstant no por kubri e gastunan di kuminda salú i produktonan di nesesidat i higiena manera habon, detergente, toaya femenina, pasta di djente, deodorante, etc for di e lokual e ta haña na onderstant pa e i su famia. Esaki ta resultá mas i mas den yunan na skol ku no a desayuná, problemanan ku salú króniko i problemanan emoshonal i mental.
Ahuste outomátiko i struktural di e montante di onderstant na oumento di kosto di bida no mester ta ningun problema. E kantidat di kobradónan di onderstant tin e nivel di hendenan ku no por traha. Tambe, e montante di onderstant lo no alkansá e salario mínimo, ya ku esaki tambe ta keda adaptá anualmente na subida di kosto di bida. Gobièrnu a haña tambe varios konseho riba e nesesidat di adaptá onderstant. MAN-PIN ta konta den esaki ku apoyo di tur otro frakshon den Parlamento.