Tur pais den Reino ta rekonosé importansia di kolaborashon pa fortifiká estado di derecho i bon gobernashon. P’esei Aruba, Kòrsou, Hulanda i Sint Maarten ta traha huntu pa kombatí krímen di ‘ondermijning’, korupshon i froude i promové integridat. Asina minister di Hustisia i Siguridat (J&V) Foort van Oosten i sekretario di estado Eddie van Marum ta skirbi Tweede Kamer awe. Motibu di esaki ta un moshon di Kamer ku ta boga pa un aserkamentu mas fuerte di entre otro kombatimentu di froude, krímen di ‘ondermijning’ i korupshon.
Atendementu ku ‘ondermijning’
‘Ondermijning’ ta un tipo di kriminalidat organisá den kua e esferanan legal i ilegal, komunidat desente i mundu kriminal ta meskla ku otro. E posishon geográfiko den serkania di Amérika Latino i Norteamérika i e ruta komersial pa Oropa ta hasi e parti karibense di Reino èkstra vulnerabel pa krímen di ‘ondermijning’, manera kontrabanda di droga i arma i trafikashon ilegal i kontrabanda di hende. Tambe e eskala chikitu di e islanan ta enserá un riesgo mas grandi pa konflikto di interes no intenshoná.
Kriminalidat ku ta krusa frontera i krímen di ‘ondermijning’, kombatimentu di korupshon i froude i promoshon di integridat ta asuntunan outónomo di Aruba, Kòrsou i Sint Maarten. E paisnan tin di aber al respekto ku mas vulnerabilidat, debí na kapasidat limitá na personal i rekurso. P’esei Hulanda ta traha huntu ku Aruba, Kòrsou i Sint Maarten pa pone kapasidat adishonal, ekspertisio i rekurso disponibel pa kombatí krímen di ‘ondermijning’.
Sekretario di estado di BZK Eddie van Marum ta enfatisá importansia di e aserkamentu pa habitantenan: “E gobièrnunan den Reino ta kompartí un responsabilidat konhunto pa kombatí e formanan akí di ‘ondermijning’. ‘Ondermijning’ pues ta hasi daño na funshonamentu di atministrashon públiko i e konfiansa di siudadanonan den un gobièrnu honesto i íntegro. Habitantenan den henter Reino mester por konfia riba un estado di derecho sólido i resistente.”
E kolaborashon entre Hulanda i e tres paisnan karibense riba tereno di ‘ondermijning’ ta tuma lugá riba tantu tereno penal komo atministrativo. Ademas tin kolaborashon riba tereno di bon gobernashon i integridat.
Aserkamentu penal i atministrativo di ‘ondermijning’
For di 2017, Hulanda ta sostené tres partner di kadena den e paisnan pa loke ta trata atendementu penal di ‘ondermijning’: pa medio di e Recherchesamenwerkingsteam, Ministerionan Públiko den e paisnan i Korte Komun di Hustisia. E añanan benidero ta enfoká riba mas kapasidat i ekspertisio pa hasi investigashon penal tokante kriminalidat finansiero ekonómiko. Tambe tin mester di un mihó bista riba fluho di plaka kriminal. Pa un atendementu mas efisiente den esaki ta hasi uzo di hende i rekursonan a base di informashon spesífiko. Pa e aserkamentu penal a reservá anualmente 24 mion euro.
Pa e aserkamentu atministrativo di ‘ondermijning’ ademas a stipulá un protokòl. Ministerio di BZK ta destiná anualmente 1 mion euro pa esaki. Ku esaki e tres paisnan karibense a lansa e kampaña Not On Our Island ku e meta pa konsientisá komunidat mas pa loke ta trata ‘ondermijning’. E paisnan a pone tambe komo meta pa na fin di 2026 tin un plataforma establesé, segun e modelo di Regionale Informatie en Expertise Centra (RIEC) na Hulanda.
Bon gobernashon i integridat
E último añanan e paisnan karibense a dal diferente paso riba tereno di bon gobernashon i integridat. Por ehèmpel Sint Maarten tin for di 2019 un Kámara di Integridat i na Aruba tin for di 2021 e Ofisina di Integridat Aruba. Kòrsou tambe ta lantando un ofisina di integridat. Ademas e paisnan karibense a introdusí reglanan pa finansiamentu di partidonan polítiko i ‘screening’ di mandatarionan nobo i empleadonan públiko ta haña ‘training’ di integridat. For di 2023 ta tene tur aña e ‘Integrity Summit Dutch Caribbean’ pa promové ekspertisio di funshonarionan di integridat. E meta ta pa realisá un Sentro di Konosementu Karibense pa Promoshon di Integridat na 2026, ku por sostené tantu e paisnan komo e Entidatnan Públiko. Finalmente ta investigá den konsulta ku e paisnan kon por vigilá mas mihó posibel progreso di e trayektonan riba tereno di bon gobernashon i integridat. Por ehèmpel pa medio di National Integrity System Assessments ku ya a implementá den e paisnan. Ku Transparency International ta sigui deliberá tokante posibel instrumentonan di vigilansia, tumando na kuenta nan konosementu i eksperensia den sigui tendensianan i korupshon riba nivel mundial.