Parlamentario Edgar Vrolijk a lanta critica fuerte contra gobierno AVP-FUTURO tocante e manera cu e cambio na Landsverordening instelling ministeries (LIM) a wordo trata y incorpora den e presupuesto. Segun Vrolijk, e proceso cu a sigui ta incorecto, huridicamente problematico y lo tin consecuencia negativo pa gobernacion di Aruba.
Vrolijk a elabora riba un amienda presenta door parlamentario Mike de Meza, cu ta trata e LIM, un ley cu ta establece y organisa e structura di e ministerionan di gobierno. Segun e parlamentario, loke gobierno a haci den Parlamento cu e amienda aki ta “un berguensa” y ta mustra un acto di malicia politico di parti di e gobienro y coalicion AVP-FUTURO, cu excepcion di Parlamentario Mike de Meza.
Segun Vrolijk, na momento cu gobierno a hinca e cambio di LIM directamente den e presupuesto, esaki a crea un situacion cu no a sigui e caminda huridico corecto. “E cambio no a bay Raad van Advies, loke cu ta un paso esencial den proceso legislativo,” el a bisa.
El a indica cu gobierno claramente a bypass e rol di Parlamento, pasobra despues cu e LIM a wordo vota como parti di e presupuesto, e asunto a wordo manda despues pa Raad van Advies. Segun Vrolijk, e conseho legal lo seguramente indica cu e LIM no cuadra cu e ley vigente, pero ya lo ta laat.
“E daño cu esaki ta causando lo no limita na e aña actual, pero lo keda refleha den presupuesto di futuro gobernacionnan,” Vrolijk a advierti.
Ademas, el a recorda cu parlamentario Mike de Meza mes a reconoci cu e cambio propuesto ta implica un cambio constitucional, loke cu exigi un cambio den Staatsregeling di Aruba. Pa un cambio di e tipo aki, ta necesario un mayoria di dos tercera parti di Parlamento.
Segun Vrolijk, e apoyo politico necesario no tabata presente. “Ni sikiera den e coalicion mes tabatin sosten suficiente, y oposicion no tabata dispuesto pa yuda pasa e ley,” el a bisa. El a agrega cu mirando e postura di partido FUTURO, y tambe actitud di algun parlamentario di coalicion cu a retira nan apoyo na un fase trempan, ta cla cu e ley no tabata y lo no ta alcansa e mayoria constitucional necesario.
Pa e motibo aki, Vrolijk ta considera cu e amienda di Mike de Meza practicamente “por keda pa olvido”.
E parlamentario a conclui cu ta importante pa sigui observa kico posicion parlamentario Mike de Meza lo tuma den futuro, specialmente mirando cu partido FUTURO, segun Vrolijk, ta sigui “trapa riba AVP” cu aprobacion di prome minister Mike Eman. “AVP ta bira cada dia mas ireconocibel y debil.
Finalmente, Vrolijk a enfatisa cu aunke De Meza a declara cu lo e busca sosten di “links y rechts”, realidad politico ta mustra cu ni un ni otro banda lo duna e apoyo necesario. “Si ni pa un cambio di ley normal no por haya mayoria den su mes coalicion, imagina ora cu tin mester 14 voto pa un cambio constitucional,” el a conclui.
Segun Vrolijk, e unico caminda huridicamente corecto pa e tipo di cambio den LIM ta via un proceso constitucional completo, conforme cu Staatsregeling di Aruba debi cu a apropa pa e LIM bay den e presupuesto, un acto di malicia di gobierno di AVP-FUTURO