E posicion publico di e minister Gerlien Croes no ta cuadra cu e rumbo cu e gobierno actual ta sigui, specialmente riba implementacion di Rijkswet HOFA, un ley cu ta representa un debilitamiento di autonomia di pais Aruba.
Durante e conmemoracion di Dia di Betico Croes, un dia nacional cu tin un significado historico y simbolico pa Aruba, varios discurso politico a provoca reaccion fuerte den comunidad. Specialmente e palabra nan di Minister Gerlien Croes a lanta pregunta serio riba coherencia politico y respet pa e legado di Betico Croes.
Critica ta surgi pa e posicion cu minister Croes a expresa publicamente riba e lucha pa Status Aparte, mientras, tras di cortina partido FUTURO actual ta hinca su esfuersonan pa implementacion di Rijkswet HOFA hunto cu Minister Geoffrey Wever. Pa hopi ciudadano, e combinacion aki ta wordo mira como contradictorio y problematico, principalmente riba un dia dedica na autonomia y libertad di Aruba.
Dia di Betico Croes mester ta un momento di reflexion nacional, unda pueblo ta honra e lucha historico pa autodeterminacion. Den e contexto aki, discurso di Prome Minister Mike Eman durante e ceremonia di mainta a wordo ricibi di forma positivo, pasobra el a subraya e necesidad di unidad nacional y a expresa claramente cu AVP ta contra Rijkswet HOFA, un posicion cu el a mantene consistentemente durante su campaña politico, pero ora sinta cu partido FUTURO a cambia di nochi pa mainta, pero na mes momento di curason ta mira e mensahe cu a ser manda riba die di Betico.
Sinembargo, criticanan ta apunta cu e coalicion actual, prinsipalmente partido FUTURO, a contribui na un clima di division politico y decisionnan cu segun nan pone interes financiero riba bienestar di pais general ta prome, placa ta tur cos pa partido FUTURO y no e Pais den su totalidad. E preocupacion principal ta cu algun lider hoben den politica no ta carece di suficiente sensibilidad historico y compromiso profundo cu futuro di Aruba.
Votantenan cu a duna nan confianza na e coalicion actual ta wordo yama pa evalua e rumbo cu pais ta tuma y e diferencia entre promesa politico y accion practico. Specialmente riba un dia simbolico manera Dia di Betico, pueblo ta spera claridad, respet y sinceridad.
E debate riba Rijkswet HOFA, autonomia y relacion cu Hulanda ta sigui di ta un tema central den politica Arubiano. Pueblo di Aruba, cu un consciencia historico fuerte, ta keda mira di cerca y no ta exclui cu e lo expresa su opinion claramente den futuro cercano. Discusión riba Status Aparte y Rijkswet HOFA ta causa polemica na Dia di Betico y e rumbo cu Aruba no kier bay pero asina mes minister Gerlien Croes y Geoffrey Wever ta keda persisti riba un caminda cu e pueblo di Aruba a vocifera atrabes di su firmanan cu ta no na Rijkswet HOFA.