Sindicatonan den bloke na Aruba a expresa preocupacion despues cu Rijksministerraad (RMR) a duna luz berde pa e propuesta di Rijkswet HOFA sigui su proceso bay Raad van State pa conseho.
Sindicatonan di Aruba a reuni pa discuti e desaroyo reciente y a manda un mensahe cla tocante nan posicion riba e ley. e momento actual unda Aruba ta celebra 40 aña di Status Aparte y 50 aña di Himno y Bandera ta exigi reflexion profundo riba e direccion cu pais ta tuma sin autorisacion di e pueblo.
E sindicatonan ta mustra preocupacion cu e propuesta di Rijkswet HOFA, a wordo procesa sin consenso amplio, particularmente na Hulanda. Nan ta considera cu esaki por tin implicacionnan serio pa posicion di Aruba dentro di Reino Hulandes.
Jose Figaroa, representante di Sindicatonan Uni, a splica cu un Rijkswet ta un ley di Reino, unda influencia di Parlamento di Aruba ta limita.
“Den un Rijkswet, e rol di Parlamento di Aruba ta practicamente inexistente,” Figaroa a indica, enfatisando e preocupacion riba participacion democratico den e proceso.
Sindicatonan ta sostene cu e falta di participacion y consenso por afecta autonomia di Aruba y e manera cu decisionnan importante ta wordo tuma.
Nan a haci un yama pa mayor dialogo y transparencia, insistiendo cu temanan di tal magnitud mester wordo trata cu participacion di tur sector relevante den sociedad.
E propuesta di Rijkswet HOFA ta genera discusion amplio na Aruba, principalmente riba e implicacionnan financiero, legal y institucional. Diferente grupo den sociedad, incluyendo sindicatonan, ta sigui expresando nan preocupacion y ta pidi mas claridad riba e proceso y pa para esaki den e bachi cu e ta na e momentonan aki.
