Lider di fraccion di MEP Evelyn Wever Croes a tuma e oportunidad pa gradici sindicatonan pa nan presencia, curashi y preparacion durante un reunion reciente riba Rijkswet HOFA, remarcando e esfuersonan di sindicatonan pa comprende e contenido y e punto di principio den e debate politico.
Segun Croes , e debate ta uno cu mester wordo hiba den parlamento, pero no tur parlamentario a asumi e responsabilidad necesario. Sindicatonan a subraya cu e Bestuurlijk Akkoord no ta BINDEND y circunstancianan por cambia, Danki pa subraya cu e ponencianan durante di eleccion di cual 85 % tabata contra di e Rijkswet y awor aki no.
Pero tambe lider di fraccion di MEP Evelyn Wever Croes ta gradici sindicatonan di a trece claridad cu e Rijkswet no por wordo cambia unabes cu parlamento di Aruba acepta esaki , Parlamento di Aruba no por cambia esaki mas den parlamento.
Hopi a wordo bisa di kico a wordo firma, pero ta importabte di para keto atrobe y bisa cu locual cu a wordo firma semper a bin parlamento prome y parlamento tabatin un mocion cu a duna cuadro. Evelyn Wever Croes tabata hopi cla cu parlamentario Bermudez cu ta critica e firma di Bestuurlijk Akkoord, pero e realidad ta cu a firma e BA pa bo por a come, Croes a indica
Ta tempo pa para keto y realisa kico a pasa e tempo ey y stop di uza e argumento di Bestuurlijk Akkoord pa no tuma bo responsabilidad como parlamentario y tuma un posicion.
na loke Secretario di Estado Eric van den burg a bisa sindicatonan ayera, un dia pasa. El a bisa nan cu nan a negocia cu gobierno anterior, despues nan a negocia cu gobierno actual. El a bisa cu nan tabata sa cu tin diferencia di opinion, pero cu na fin di dia, ta gobierno di Aruba di AVP y FUTURO a firma y cu a bay di acuerdo, ta kere cu esey ta importante pa nos subraya, pasobra e ta bin di Hulanda mes.
Fraccion di MEP, ta contra e Rijkswet HOFA pa diferente motibo. Prome, pasobra e ta contra palabracionnan haci cu Hulanda den e Bestuurlijk Akkoord di 2024, manera mi a elabora extensamente den e reunion Cft. E Rijkswet HOFA manera e ta awo riba mesa no ta bon pa Aruba. E lo hinca Aruba den problema mescos cu Corsou cu St. Maarten. Pero principalmente e no ta necesario, pasobra riba nos propio forsa nos a demostra cu nos por saca Aruba for di e crisis financiero cu e tabata aden. E problema principal cu e Rijkswet ta e bachi, y esey ta loke nos a vocifera tambe.
Sindicato a haci nos algun pregunta y Lider di fraccion di MEP a contesta tur e preguntanan hunto. Cu nos ta subraya y nos ta comparti e posicion di sindicatonan cu ora Hulanda ta bisabo ‘mi ta bay bin cu un Rijkswet ta pasobra mi no tin confianza den bo’, esey ta algo cu Parlamento aki, si bo puntra nos, ta inaceptabel. Ora cu Hulanda bisa pasobra obviamente no tin confianza cu pueblo por scoge representantenan debidamente, ta inaceptabel pa nos fraccion. E preguntanan aki ta bon pregunta pa nos reflexiona riba nan. Nos lo haci esey tambe internamente, pero ya caba mi por bisa nos ta comparti e opinion.
Pero mas importante cu tur cos ta cu sindicatonan akinan, representando miles y miles di ciudadano di nos pais,den momentonan aki loke nos mester den nos pais ta liderazgo y union. Aruba a logra cosnan grandisimo den pasado danki na liderazgo fuerte y union. Danki cu nos lidernan no a sconde, bisa ‘ban warda ki dia nos ta haya un conseho di Hulanda pa nos tuma un posicion’. Danki cu nos lidernan no a scoge pa desuni na momentonan crucial di nos historia. Nos pais mester liderazgo y union, mescos cu nos a logra nos Status Aparte, mescos cu nos a logra cosnan grandi pa Aruba den e ultimo añanan aki.
Di parte di fraccion di MEP, ta propone na presidente di parlamento Marlon Sneek pa yama un reunion publico, un debate publico, un Openbare Vergadering otro siman mes. Y ta kere cu comerciantenan por haya un reunion den un dia e ora e Openbare Vergadering por wordo yama den un siman caminda parlamentarionan lo debati y tuma posicion.
Tin suficiente informacion riba mesa awo, E Rijkswet HOFA a bay contra mocion di Parlamento. E Rijkswet aki a bay contra palabracionnan haci den cuadro di IPKO entre e parlamentonan. E Rijkswet aki ta contra nos Constitucion. Bo no mester Raad van State pa bisa esey, un hurista di su prome aña di universidad por bisa esey. P’esey den e momento aki, ta importante pa yama e reunion aki otro siman mes, fraccion di MEP ta dispuesto pa traha e draft di e peticion riba un blachi blanco sin logo y cu e no ta bin di yun partido, y invitacion na tur 21 parlamentario ta pa firma e peticion aki pa e debate publico aki tuma luga otro siman mes cu firma di tur 21 parlamentario di Parlamento di Aruba. Pa asina nos tuma un posicion pa trece trankilidad den nos comunidad.