Durante e ultimo lunanan tabatin hopi intrankilidad den politica y den gobierno di Boneiro. Pa e motibo aki, Gezaghebber a ricibi pregunta y peticion pa interveni den e gobernacion local.
Gezaghebber ta splica kico su rol ta. E ta un mandatario independiente y e no ta traha na nomber di un partido politico. Su tarea ta, entre otro, pa yuda vigila bon gobernacion e integridad gubernamental. Colegio Ehecutivo ta forma e gobernacion diario di Boneiro, cu Gezaghebber como presidente.
Kico a pasa? Den nos sistema di gobernacion ta conta: Colegio Ehecutivo ta keda na mando tanten cu e tin confianza di Conseho Insular. Ta te ora cu Conseho Insular bisa oficialmente cu e confianza aki no t’ey mas, ta bini cambio den esaki.
Ultimo tempo sosten politico pa e gobernacion actual a bira mas chikito. Riba diamars 31 di maart 2026, e diputadonan a entrega nan retiro. Despues di esaki a planea un reunion di urgencia riba diahuebs 2 di april 2026 pa propone diputadonan nobo. Riba e mesun dia a bini dilanti tambe cu UPB, MPB y e miembro independiente di Conseho Insular, Sr. Serberie, kier forma un coalicion nobo hunto.
Kico ta rol di Gezaghebber? Gezaghebber ta presidente y miembro di Colegio Ehecutivo. Den e rol aki e tin algun tarea y competencia. E por pone topico riba agenda y e mes por haci proposicion. Tambe e ta yuda promove colaboracion y unidad den gobernacion. Den esaki, Gezaghebber no tin e tarea pa e mes forma un gobierno nobo. Esaki ta tarea di Conseho Insular y e partidonan politico.
Banda di esaki, Gezaghebber tin un rol mas informal tambe. E ta papia cu mandatarionan, yuda caminda ta necesario pa tene combersacionnan andando y e ta vigila bon gobernacion. Pero den esaki tambe e ta keda den e limitenan di ley y di su posicion independiente.
Kico esaki ta nifica pa nos habitantenan? Pa habitantenan nada no ta cambia aworaki den e servicio diario di Entidad Publico Boneiro. E tareanan di gobierno ta sigui cana normalmente. Gobierno ta sigui traha riba su tareanan y su servicio normal. Den un situacion anterior comparabel cu esaki, Entidad Publico Boneiro a splica tambe cu ley ta netamente destina pa salvaguardia continuidad di gobernacion ora cu falta diputado.
Pa nos habitantenan esaki ta nifica:
- Acuerdonan, loketnan y servicionan di gobierno cu ta andando ta continua;
- Por atende cu decisionnan cu no por warda;
- E situacion gubernamental ta cambia, pero gobierno ta sigui funciona.
Mañan, diahuebs 2 di april 2026, Conseho Insular ta reuni atrobe pa propone tres diputado nobo. Pa e motibo aki tin bista riba un traspaso rapido pa un Colegio Ehecutivo nobo.
Mira padilanti Goberna Boneiro ta un responsabilidad grandi. Diferencia di opinion ta forma parti di politica, pero ta importante pa gobierno di nos isla keda stabil y sigui traha bon pa su habitantenan. Gezaghebber ta sigui compromete su mes pa bon gobernacion y integridad gubernamental.