Recentemente funda pa e eleccionnan di 2027, Partido Pueblo Progresivo (PPP), un partido di derechonan humano, ta representa cambio real, creando un generacion nobo di personanan dedica.
Nos ekipo lo ta forma pa abogado, educador, artista, oficial di orden publico, empresario, trahado, hoben profesional, lider di comunidad y ciudadano di tur sector di comunidad. Nos ta busca hende pa uni cu nos ekipo, hende di tur edad, cu experiencia of sin experiencia, Boneriano of no-Boneriano. Tur nacionalidad ta bon bini. A yega tempo pa un generacion nobo di lidernan comprometi y cu vision, cu ideanan fresco, integridad y e curashi pa move nos isla dilanti colectivamente.
Pa hopi tempo caba, nos a mira e mesun ciclo politico ripiti su mes: e mesun lidernan saltando di un partido pa otro, reciclando e mesun ideanan y dunando e mesun resultadonan, sin desaroyo significante ni beneficionan real pa e pueblo di Boneiro. Boneiro no por move dilanti como un isla prospero di 25,000 hende sin liderasgo fuerte, responsabel y cu vision.
Nos mester di tur hende di Boneiro—Latino, Hulandes, Ingles y tur esnan cu ta stima Boneiro—pa comprende cu nos mester haci esaki hunto y no tira falta riba otro. E identidad unico, cultura y tur cos cu nos ta stima di Boneiro ta bayendo perdi. Como Boneriano, nos ta un minoria y nos no por haci esaki nos so. Nos mester di hende di tur nacionalidad na Boneiro pa uni cu nos movemento pa crea cambio real y significante.
Historicamente, e partidonan politico actual a sali for di un solo partido politico: Partido Democrata (DP). DP a fragmenta den tur e partidonan politico di awendia. DP, bou liderasgo di e famia Abraham, a split den UPB cu lider Ramonsito Booi. Despues UPB a split atrobe den MPB cu lider Elvis Tjin Asjoe. Den e ultimo eleccion, MPB a split atrobe den M21 cu lider Daisy Coffie. Nan tur ta wordu manipula dor di Den Haag. Na 2017, e grupo di partido y lidernan aki a bay di acuerdo pa laga Den Haag integra Boneiro den Constitucion Hulandes, entregando asina nos poder di tuma decision local riba nos isla.
Awor e mesun lidernan aki—Nina den Heyer y Angelica Cicilia—a split atrobe pa forma un partido nobo pa e eleccionnan di 2027. Ta hopi obvio: e mesun caranan, e mesun forma di haci cos, e mesun conseheronan manera Burney Elhage y Nochi Willem, impulsa pa interes propio y un manera di pensa anticua.
Nos partido politico no lo inclui ningun di e lidernan of conseheronan recicla di awendia of di pasado. Boneiro merece miho. Si bo ta cansa di e mesun cos cada bes y bo ta kere den cambio, bo tin un luga den e movemento aki. Hunto nos por kibra e ciclo. Hunto nos por traha un futuro nobo.
James Finies