Un di e gastonan mas grandi cu Pais Aruba ta enfrenta anualmente ta e pago di interes riba e fiansanan existente, alcansando casi 300 miyon florin pa aña. Sinembargo, e implementacion di e ‘Constelacion di Hofa’ ta habri porta pa un reduccion considerabel den e gastonan aki, loke lo permiti e gobierno inverti miyones den sectornan vital pa e pueblo. Pero esaki no ta bay sin duna, esta entrega bo libertad.
E impacto di interes halto riba finansa publico
Actualmente, Aruba ta paga interesnan halto riba e fiansanan cu a wordo adkiri, specialmente durante e crisis di COVID-19, pero Aruba ta cumpli cabalente cu e pagonan. Segun Minister Geoffrey Wever e cifranan ta indica cu pa e prestamonan di COVID ta pagando un interes di 6.9%, mientras cu riba e mercado internacional e averahe ta rond di 6.5%. Esaki ta nifica cu un parti significante di e placa di impuesto di e ciudadano ta bay directamente pa banconan na exterior, en bes di keda den e economia local.
Flexibilidad y Supervision Financiero
E discusion actual rond di e Rijkswet Houdbare Overheidsfinanciën (Hofa) ta centralisa riba e necesidad di un cuadro huridico cu ta duna Aruba e espacio pa refinancia su debedanan na un tasa di interes hopi mas abou. Aunke Hulanda no tin un obligacion legal pa yuda cu e refinanciamento aki, nan a expresa disponibilidad pa haci esaki bou di e condicionnan di e ley nobo, segun minister Geoffrey Wever .
Bou di e constelacion di Hofa, e supervision financiero lo bira hopi mas flexibel compara cu e sistema actual, pero cu condicionnan cu Aruba no por Sali nunca mas for di bou man di Hulanda su desicionnan. Segun Minister Geoffrey Wever HOFA lo duna e Gobierno di Aruba mas “aire” y espacio pa maneha e finansa di e pais di un forma mas eficiente.
E meta principal di e negosacionnan aki ta pa spaar un suma substancial na interes pa aña a cambio di e liberdad finansiero cu Aruba mes por dicidi unda kier inverti den su Pais. E fondonan cu wordo libera por wordo re-ingeta directamente den comunidad di Aruba, pero cu autorisacion di Hulanda, sin autorisacion esakino por sosode. Entre e prioritadnan pa inversion ta wordo menciona:
- Enseñansa: Mihor recurso pa nos scolnan y studiantenan, si Hulanda aproba.
- Infrastructura: Mantencion y desaroyo di nos caminda- y edicionan publico, si Hulanda aproba.
- Salubridad Publico: Fortalece e cuido pa nos grandi- y hobennan, si Hulanda aproba.
Cu e reduccion di e gastonan di interes, e placa di e pueblo Arubiano lo keda Aruba mes, brindando e posibilidad pa eleva e calidad di bida pa tur habitante di e isla , solamente si Hulanda aproba.