Loke a cuminsa como un keho riba e mal estado di un edificio di KPA na St Cruz , a bira un analisis profundo riba e falta di prioridad di e gobernantenan. Ambtenaarnan di e sector di siguridad ta adverti cu si no inverti den e pilar nan fundamental di e pais, Aruba ta core riesgo di drenta den un crisis di instabilidad cu lo afecta tur ciudadano.
E Tres Columna nan Vital
Segun Francel Bernardus di sindicato SPA, un pais mester wordo construi riba tres pilar fundamental pa e keda stabiel y prospero. Nan ta argumenta cu e inversion mester wordo dirigi prome cu tur cos na:
- Salubridad: Un poblacion sano ta e base di tur progreso.
- Husticia: Un pais sin un sistema di husticia fuerte y bon ekipa no ta atractivo pa turismo ni sigura e bienestar di su mesun ciudadanonan.
- Enseñansa: Sin educacion di calidad, e futuro di e pais ta keda comprometi.
Francel Bernardus di sindicato SPA ta enfatisa cu ora bo inverti den e areanan aki, bo ta crea un “efecto domino” positivo. Si e tres ramonan aki ta fuerte, e resto di e pais lo sigui den mesun direccion di stabilidad, evitando asina situacionnan di caos den futuro.
“Aros con Coco”: E Frustracion cu Proyectonan Cancela
E personal a relata con e speransa pa un miho luga di trabou a pasa di un mandatario pa otro sin ningun resultado. E proyecto pa un edificio nobo (Codemsa) a wordo presenta pa ex-minister Andin Bikker, pasa pa ex-minister Rocco Tjon, y awor bou di Minister Arthur Dowers e proyecto a wordo cancela pa falta di fondo segun e mandatario.
“Nos a keda cu aros con coco,” e ambtenaarnan a expresa, referiendo na e promesanan bashi. Nan ta cansa di mira ministernan saca potret y papia bunita mientras e realidad den e oficina ta alarmante: schemel (fungi) na muraya, blafon deteriora cu ta bini abou, y airconan cu no ta funciona.
Un Yamada na e Prioridadnan di Gobierno
E trahadonan ta cuestiona e vision di e gobiernonan cu a pasa, indicando cu kisas e ideanan t’ey, pero e prioridadnan ta robes. Pa mantene Aruba como un di e islanan mas safe den region, no por laga e departamentonan cu ta vigila e siguridad aki na banda.
“Nos a yega na nos punto final. Bo no por pidi e ambtenaar pa traha cu amor y profesionalismo ora e ambiente mes ta kibrando nan animo y salud,”
E mensahe pa gobierno ta cla: e ambtenaarnan no ta acepta mas promesa pa futuro. Nan ta exigi un contesta “ASAP” (mas pronto posibel) y un cambio real caminda e pilar nan di husticia, salud y enseñansa wordo tuma na serio prome cu e deteriora di e pais bira ireversibel.