Diasabra atardi, un biaha mas a registra un accidente fuerte na e conoci cruzada di Caya Juan Pablo Duarte. Maske e biaha aki no tabatin herido grave, e daño material tabata considerabel y e impacto a bolbe lanta e discusion riba e seguridad di e cruzada aki.
E suceso a tuma lugar den careda di atardi, ora cu dos vehiculo a dal fuertemente den otro. Segun testigo y datonan preliminar, e causa principal ta keda e falta di duna preferencia, un problema cu ta bolbe repiti su mes constantemente na e sitio aki.
Pa locual ta trata e impactonan, e golpi tabata di tal envergadura cu ambos auto a sufri daño material hopi grandi. Ambulancia y autoridadnan a presenta na e sitio pa evalua e situacion. Di forma milagroso, a confirma cu no tabatin ningun persona seriamente herida,”locual ta un alivio mirando e Estado den cual e vehiculonan a keda.
Un cruzada di alto risico
E cruzada aki ta conoci pa ta un ‘black point’ (un sitio di hopi peligro) den trafico, caminda cu frecuentemente ta reporta accidentenan di e mesun categoria aki. E problema recurrente ta keda e confusion of irresponsabilidad di e coredornan pa duna preferencia.
Yamada na DOW: Habitante y automobilistanan cu frecuentemente ta bishita e area aki ta vocifera cu e situacion no por sigui asina. Ta bira urgente pa Dienst Openbare Werken (DOW) haci un evaluacion profundo di e cruzada aki. Ta pidi pa revisa e señalizacion, e borchi di preferencia miho, of busca un solucion infrastructural pa asina stipula claramente pa e automobilistanan ken tin preferencia si of no, prome cu un conoce morto na e crusada.
