Sindicato di Polis di Aruba (SPA) a bolbe saca cara pa su miembronan despues di un intento recien pa altera maneho di pago di ‘Bon di cuminda ‘ (pagonan di compensacion/oranan extra). Segun e sindicato, danki na nan insistencia y intervencion directo, e Cuerpo Policial di Aruba (KPA) a coregi e situacion, restorando e trankilidad laboral.
E problema a acenta e luna aki, ora cu directiva di SPA a nota un intento pa desvia di e liñanan di maneho stipula for di aña 2020. E decision ey tabata stipula cu no tabata bay cumpli cu e pagonan aki, loke a lanta masha disgusto.
Intervencion directo cu Korpschef
Segun e vocero di e sindicato, e reaccion di SPA tabata inmediato i directo pa asina para e decision aki:
Dia 4 di juni mi ta corda cu el a purba direct, of a purba coregi, locual tabata e maneho den aña 2020 pa bisa cu e ‘Bon di cuminda ‘ no ta wordo paga.SPA a atende cu mando policial mesora, bisando nan cu nan ta ‘fout bezig’.”
SPA a recorda e mando policial y autoridadnan cu na aña 2020 a yega na un areglo formal. E combenio aki no tabata unicamente cu Gobierno di Aruba, sino tambe cu Den Haag (Hulanda), caminda a palabra cu henter e aparato di husticia y gubernamental ta keda para patras di e derechonan aki. “Dus bo no por bin kita for di polis e lo cual nan tin derecho ariba,” e vocero a enfatisa.
Despues di un combersacion y un aviso via un mensahe (“app”) manda pa e Korpschef, e situacion a wordo rectifica dos siman despues. SPA a expresa di ta contento cu e Korpschef a ‘trek e recht’ y cu actualmente tur cos ta canando normal bek cu e Bon nan di cuminda , danki na e insistencia di e sindicato.
Seguridad ta e base di nos turismo
Banda di e conflicto laboral aki, SPA a lansa un yamada fuerte na tur instancia concerni pa no lubida e importancia di nos economia turistico.
Nos tur tin cu pone e schouder bou di husticia. Kico cu e turistanan ta bin pe? E ‘veiligheidsgevoel’ (e sentimento di siguransa),” SPA a splica.
E sindicato a conclui cu si no inverti den e sentimento di siguransa aki, y si no percura pa e cuerpo tin tur e hermentnan (‘tools’) y e capacidad necesario pa por draai investigacionnan debidamente, Aruba lo no por logra un solucion structural pa su siguridad nacional.