Prome Minister Mike Eman ta sigui di cerca desaroyo di mision humanitario
Prome Minister Mike Eman dialuna merdia a tuma contacto cu Marylaine Lopez, Coordinador di Calamidad di Cruz Cora Aruba, cu ta na Caracas hunto cu e prome delegacion humanitario di Aruba pa brinda asistencia despues di e temblor fuerte cu a sacudi e region di La Guaira, Venezuela. Durante e conversacion, Lopez a informa cu e team di 11 boluntario ta trahando hunto cu diferente organisacion internacional di asistencia den e area afecta.
Durante e video call señora Lopez a menciona cu ainda a registra algun temblor modera (aftershock), pero segun Lopez, tur miembro di e delegacion ta bon y e operacion ta sigui cu normalidad. “E hecho cu nos ta staciona hunto cu diferente otro pais y cu nos tin e apoyo necesario, ta duna nos hopi trankilidad. Nos ta completamente safe,” Lopez a informa nos Prome Minister Eman cu ta siguiendo tur desaroyo di cerca for di Aruba. E Coordinador di Calamidad a splica cu e team di Aruba a cuminsa caba cu su trabou. Aworaki nan ta maneha un botica di emergencia, unda caba nan a yuda mas cu 100 pashent cu entrega di remedi y atencion medico basico. Ademas, durante anochi, e boluntarionan Arubiano a brinda apoyo den e area di triage di un hospital temporario, unda aproximadamente 360 pashent a pasa pa ricibi atencion medico.
Prome Minister Eman a gradici e boluntarionan pa nan dedicacion y a comparti cu nan cu e pueblo di Aruba ta sigui nan trabou cu hopi orguyo. “Nos ta ricibi hopi reaccion positivo for di e momento cu nos a despedi di boso na aeropuerto. Aruba ta aprecia profundamente e gran esfuerso cu boso ta haciendo pa yuda e pueblo Venezolano,” Prome Minister Eman a bisa via e video call. El a indica tambe cu Gobierno ta sigui monitor e situacion di cerca y cu e preparacion pa manda un siguiente delegacion cu medico, specialistanan y ciruhano ta sigui den estrecho coordinacion cu Cruz Cora di Venezuela.
Marylaine Lopez a confirma cu e animo di e team ta halto y cu nan ta sigui enfoca riba nan mision pa brinda asistencia na e personanan cu mas mester dje. Gobierno di Aruba lo sigui mantene contacto permanente cu e delegacion na Venezuela y ta continua coordinando e siguiente fase di e ayudo humanitario cu Aruba ta brindando na e pueblo Venezolano.
