Tin momentonan den politica cu un pregunta ta bira hopi mas importante cu e contesta.
Pa lider di fraccion di PPA, Eduard Pieters, esaki ta exactamente loke ta pasando cu e 16 miyon florin cu Aruba Tourism Authority (ATA) a reserva bou di e capa di “Government Development”.
Pakico Gobierno ta reserva 16 miyon florin sin cu pueblo sa exactamente na kico ta uza e placa aki? Segun Pieters, e pregunta aki no ta politico, sino constitucional.
Transparencia como slogan
Durante Pieters su disertacion den Parlamento, Pieters a recorda cu ATA ta administra placa cu finalmente ta pertenece na pueblo di Aruba. P’esey, e ley cu ta regula ATA y e reglanan di destaho publico no ta traha pa complica gobierno. Nan ta traha pa proteha pueblo. “Cada florin cu gasta mester por ta splica.” Segun e parlamentario, ora Gobierno crea un post di 16 miyon florin sin un destinacion publico claramente identifica, Parlamento no solamente tin derecho di haci pregunta y cuestiona, sino e obligacion di haci pregunta.
No a funda ATA pa financia Gobierno
Pieters tambe a recorda e historia di ATA. Segun Pieters, e institucion ta crea pa fortalece turismo, crea balor pa Aruba y reinverti den desaroyo di pais. Nunca tabata e intencion pa ATA bira un fondo cu Gobierno por recuri na dje sin claridad absoluto.
“ATA no por bira un banco di Gobierno.” Pa Pieters, esaki ta un liña cu no mester crusa.
Confiansa ta gana cu claridad
PPA a pidi minister pa contesta claramente:
Kico exactamente lo financia cu e 16 miyon?
Tin un relacion cu e contract pa maneho di desperdicio?
Ken ta supervisa e decisionnan?
Con conflicto di interes ta wordo preveni?
Pa Eduard Pieters, pueblo no ta pidi un favor. Pueblo ta exigi cu placa publico ta maneha cu transparencia absoluto. Paso ora Gobierno no por splica con e miyonan di florin lo ta uza, e pregunta ya no ta solamente riba e aspecto financiero. E pregunta ta si ainda tin confiansa den bon gobernacion.