James Finies a participa na e evento oficial paralelo di e High-Level Political Forum (HLPF) cu titulo: “For di Doha pa Accion: Acelerando e Agenda 2030 pa medio di Enfoke Colaborativo riba Efectonan Secundario, Pobreza Multidimensional y Implementacion Integra di e SDGnan”, teni na Sede Principal di Nacionnan Uni na New York.
E conferencia a reuni representante di gobiernonan, e sistema di Nacionnan Uni, academia y sociedad civil pa papia tocante maneranan practico di acelera e implementacion di e Agenda 2030 pa Desaroyo Sostenibel, cu enfasis special riba pobreza multidimensional, coherencia den maneho y garantizando cu ningun hende no lo keda atras.
Papiando na nomber di e pueblo di Boneiru, Sr. Finies a expresa su apresio na e discusion, pero el a enfatisa cu desaroyo sostenibel no por wordo alcansa ora e hendenan mas afecta ta exclui for di e decisionnan cu ta determina nan futuro.
Durante su intervencion, Sr. Finies a bisa: “Mi ta James Finies di Boneiru, un isla den Caribe bou di administracion Hulandes for di 2010.”
Referiendo na e enfasis di e Foro riba coherencia den formulacion di maneho y eliminacion di bareranan structural pa desaroyo sostenibel, el a haci e siguiente pregunta: “Den linea cu e compromiso di Nacionnan Uni pa “no lubida y laga ningun hende atras” y yega na esnan cu ta mas atras, con e comunidad internacional por spera cu Boneiru por alcansa e Metanan di Desaroyo Sostenibel si e decisionnan fundamental tocante nos desaroyo ta wordo tuma pa un gobierno Europeo Hulandes miles di kilometer for di Boneiru en bes di wordo tuma door e pueblo di Boneiru mes?”
Sr. Finies a enfatisa cu desaroyo sostenibel ta exigi mas cu solamente maneho economico. E ta exigi participacion real, gobernacion inclusivo y responsabilisacion na e pueblo kende nan bida ta wordo afecta directamente.
Finies a conclui su intervencion cu e siguiente pregunta pa e comunidad internacional: “No mester reconoce inclusion berdadero, participacion democratico, e derecho na autodeterminacion y responsabilidad como condicionnan esencial pa desaroyo sostenibel den territorio manera Boneiru, cu no tin representacion, no tin supervision di Nacionnan Uni, no tin responsabilidad dilanti di e comunidad internacional, y ta wordo goberna externamente bou di e nivel di autogobernacion democratico reconoci pa Nacionnan Uni?”
E intervencion na e foro ta basa riba preocupacionnan cu anteriormente a wordo presenta dilanti di mecanismonan di derechonan humano di Nacionnan Uni, incluyendo e Comite di Derechonan Economico, Social y Cultural (CESCR), tocante pobreza, desigualdad, participacion den toma di decision, identidad cultural, educacion y desaroyo sostenibel na Boneiru.
E promesa di e Agenda 2030 pa “no laga ningun hende atras” mester aplica tambe na e pueblo di Boneiru. Desaroyo sostenibel ta exigi cu hendenan cu ta biba den teritorionan goberna externamente mester wordo inclui completamente den e decisionnan cu ta afecta nan futuro, y cu nan tin cu haya participacion berdadero, transparencia y responsabilidad den e proceso di desaroyo.
James Finies y BHRO a reafirma su compromiso pa sigui traha constructivamente cu Nacionnan Uni, Estadonan Miembro, organisacionnan regional y sociedad civil pa promove derechonan humano, desaroyo inclusivo y oportunidad igual pa e pueblo di Boneiru.