Den e dinamica politico y social di Aruba, un di e fenomenonan mas peligroso pero sutil cu ta menasa e desaroyo independiente di nos comunidad ta e creacion delibera di dependencia di pueblo for di su propio gobernantenan. Ora un gobierno structuralmente pone su pueblo den un posicion cu ta depende financieramente y social, e ta crea un relacion asimetrico unda e ciudadano ta perde su poder di autodeterminacion.
Un gobierno den un Estado di derecho ta pa garantisa bienestar GENERAL, siguridad y proteccion di derechonan fundamental di tur ciudadano. E relacion entre gobierno y pueblo no ta basa riba CARIDAD, sino riba un obligacion legal y etico.
E ta un obligacion di un gobierno pa tin su departamentonan pa duna e pueblo e servicio cu e mester haya y no ta e politico mester Sali for di stoel politico subi caya y hunga caridad y haci trabou nan cu basicamente ta e departamentonan cu e gobierno su obligacion ta pa duna nan e placa y e herment pa cumpli cu e pueblo, pero si e gobierno mes no ta cumpli cu e departamentonan aki , e departamento por duna e servicio na e pueblo? Pero dicon e ora e politico ta Sali for di su stoel politico di maneha, y ta bay apoya comerciantenan priva y hinca placa di pueblo den compania priva enbes den su propio companianan, pero na mes momento no ta empodera su propio departamentonan gubernamental, esaki por? Acaso tanto gobierno di Aruba y Hulanda y parlamentarionan marioneta den parlamento ta aproba pa gobernantenan baha for di e stoel y bay den pueblo yuda cu bondad y laga comerciantenan sinta riba nan stoel ? Asina aki un gobierno mester maneha? Esaki nos ta yama un bon maneho di un Pais ?
Banda di e modus operandus aki tambe sopresivamente Hulanda ta apoya e movecion aki “ Aruba is Goed Bezig “ ? Realmente Aruba is goed bezig? , of kico realmente segun Hulanda Aruba ta Goed Bezig? Pa regalanan e poder di Aruba pa un rebaho di prociento cu tin e wowo di e pueblo tapa cu e Bondad disfrasa na colanisacion?
Ora un gobierno ta enfoca riba transforma su ciudadanonan den recipiente pasivo di asistencia enbes di agente autonomo cu derecho riba oportunidad igual, ta causa un desekilibrio den e structura democratico, esaki ta sosodiendo actual na Aruba ?
Un pueblo cu ta finansieramente of maternalmente dependiente di su gobierno ta perde e bentaha critico pa exigi responsabilidad. Miedo di perde e “fabor” gubernamental ta paralisa critica publico y lo mester cana lembe y of lastra tras di un gobierno riba loke abo como ciudadano tin derecho riba dje paso abo ta paga belasting, of e pueblo a lubida of ta confundi ?
E deber fundamental di un gobierno ta pa crea un mercado laboral saludabel, educacion di calidad y un economia sostenibel pa tur hende na Aruba y no un grupito y esnan cu nan ta pik y kier. Ora ta duna asistencia como si tabata trata di un regalo personal di e gobernante, e obligacion structural ta keda cambia falsamente pa un acto di generosidad, nos ta puntra nos mes si esaki ta corecto pa nos mes?