Tourism Corporation Bonaire (TCB) ta orguyoso di por rekonosé Carlos Mancilla Hurtado komo ‘Bonaire Friend’ di luna di yüli, komo muestra di apresio pa e impreshon positivo i permanente ku el a laga tras serka un di e bishitantenan di Boneiru.
Carlos, kende ta traha den mantenshon di pisina, hòfi i bich di Chogogo Dive & Beach Resort Bonaire, a keda nominá pa Esther Miedema for di Hulanda, ku durante su estadia por a eksperensiá su presensia alegre i amabel. Den su nominashon Esther a deskribí kon tur mainta por a mira Carlos, ora ku e tabata prepará e bich i serkania di esaki, miéntras ku e tabata kanta i flùit kontentu, i asina pa kada dia e tabata krea un komienso kaluroso i memorabel.
El a kompartí ku Carlos su berdadero entusiasmo i hospitalidat a hasi su vakansi mas bunita ainda, i a sòru ku el a sinti su mes sumamente bon biní na Boneiru, loke a bira su inspirashon pa nominá Carlos komo ‘Bonaire Friend’.
“E mihó embahadornan di Boneiru hopi biaha ta e hendenan ku nos bishitantenan ta topa diariamente kuné. Carlos ta rekordá nos ku ta netamente e gestonan chikitu, manera un sonrisa, un kantika i entusiasmo sinsero, ta laga e impreshon di mas grandi atras. Nos ta orguyoso ku nos por rekonosé Carlos komo ‘Bonaire Friend’ di luna di yüli i nos ta yam’é danki pa su kontribushon na kreamentu di rekuerdonan inolvidabel pa nos bishitantenan”, segun Elesiër Angel, direktor di Tourism Corporation Bonaire.
Pa medio di e inisiativa di ‘Bonaire Friends’, TCB ta rekonosé hendenan ku ta hasi èkstra esfuerso pa krea eksperensianan inolvidabel pa nos bishitantenan i ku orguyosamente ta demostrá e hospitalidat famoso di Boneiru.
TCB ta felisitá Carlos ku e rekonosimentu bon meresí akí i ta gradisié pa su dedikashon i su kontribushon positivo na eksperensia di bishitante na Boneiru.