Presidente di Heritage Center Club Boneriano tin un meta y poco poco ta yega na e meta pa tin un e Heritage Center Club Boneriano manera a ser priminti. Presidente di Heritage Center Club Boneriano Gregory Goedgedrag ta conta un poco kico ta e accion di limpiesa cu ta bay tin dia 22 di augustus benidero.
Segun Goedgedrag, e fundacion a ser lanta dia 8 di november 2024 y awor nan enfoke principal ta riba e gran accion di limpiesa cu lo tuma luga dia 22 di augustus. Ya caba e fundacion a ricibi un cooperacion grandi for di 28 boluntario di Hotel Secrets Baby Beach, cu a yuda haci un trabou pisa pa laga e luga limpi paden y pafo. E meta di e limpiesa aki ta pa e edificio ta cla pa e celebracion di Dia di Boneiro, cu lo tuma luga dia 6 di september proximo.
Pa e accion di dia 22 di augustus, e club ta conta cu mas of menos 40 boluntario caba, pero tin mester di mas man. Tambe nan ta pidi un baki di sushi adicional di 20 yarda y material manera martiu, scop, garoshi, y basora. Goedgedrag ta haci un yamada na henter e comunidad Boneriano na Aruba cu ta wordo calcula na mas of menos 30.000 hende y na e comunidad Arubiano en general pa bin duna un man. E trabou lo cuminsa 7:00 di mainta te cu 1:00 of 2:00 di merdia.
Despues di e celebracionnan, e club lo enfoca riba e restauracion completo di e edificio cu ta planea pa cuminsa na januari. Pa recauda fondo pa e proyecto aki, lo organisa un bingo grandi dia 31 di october. Ken cu kier duna un man como boluntario of haci un donacion, por tuma contacto cu Gregory Goedgedrag na e number 592-5129.
