Despues di 9 luna di silencio, Minister Croes riba 28 di augustus 2026 a contesta por escrito e
preguntanan tocante su biahe cu jet priva pa Corsou riba 19 di november 2025. Lastimamente
e minister a laga e preguntanan mas crucial sin contesta.
Loke e minister awo mes ta confirma
Pa prome biaha e minister a confirma por escrito cu el a paga un parti di e costonan di e
vuelo. Specificamente: el a contribui na e landing fee. Esaki ta algo diferente di loke el a bin
ta bisa durante e ultimo 9 lunanan. Su splicacion a cambia diferente biaha: prome tabata un
"lift", despues el a paga e vuelo completo, despues "share cost", y awor solamente e landing
fee. Tur esakinan no por ta berdad na e mesun momento.
Loke e minister ta nengando di bisa
Un landing fee no ta e costo total di un jet priva. Combustibel, crew, handling y costonan
operacional no ta inclui den esey. E minister ta confirma cu e no a paga esakinan, pero ta
nenga di bisa ken si a paga nan.
Su argumento: e pago ta parti di su bida priva y p'esey e no mester duna cuenta na
parlamento. Pero ta aki e problema ta sinta. E Chief of Staff di su propio ministerio a
confirma por escrito riba 19 di november 2025 via un e-mail manda pa Ministerraad cu esaki
tabata un dienstreis oficial. E minister no por trata un biahe oficial como asunto priva ora cu e
ta cumbini’e pa no duna cuenta.
Loke e Gedragscode pa Ministernan ta bisa
E Gedragscode pa Ministernan ta cla: si un otro persona a paga parti di e costonan di un biahe
oficial, e minister tin e obligacion pa declara y hustifica esey. E minister ta bisa cu e
Gedragscode no ta aplica aki. Esey ta huridicamente incorrecto.
Loke e Bezwaaradviescommissie LAR a establece
E Bezwaaradviescommissie LAR a declara e bezwaar di fraccion GEGROND y a establece
cu e minister a viola e principio di zorgvuldigheid. E minister tabata tin e obligacion legal pa
contesta inhoudelijk, el a nenga di haci’e. Awor el a contesta pero parcialmente.
E preguntanan cu ta keda
Ken a paga e resto di e costonan di e vuelo?
Bou ki condicion esey a wordo haci?
Con esaki a wordo declara conforme e Gedragscode pa Ministernan?
"Nos no ta pidi pa mira e cuenta bancario personal di e Minister. Nos ta pidi informacion
tocante un pago cu e Minister mes ta confirma cu el a haci en relacion cu un biahe oficial
como Minister. Si tin informacion priva riba e recibo, ley ta stipula cu bo mester kita e
informacion priva y mustra prueba di cuanto a paga, ki dia, y na ken. Esakinan no ta
informacion di bida priva di e minister. Esaki ta informacion publico den su rol como
minister di nos pais," segun lider di Fraccion Evelyn Wever-Croes.
E siguiente paso
E Minister a wordo invita diestres (13) biaha den e ultimo 9 luna pa duna cuenta den
Parlamento. E no a aparece. Awor cu e mes a confirma cu el a paga parti di un biahe oficial y
cu un tercer persona a paga e resto — e pregunta ta keda ainda sin contesta. E Presidente di
Parlamento y e Minister mester fiha e fecha di e reunion. Si nan no haci'e, Parlamento lo
sigui tur caminda legal disponibel, incluyendo Corte y Ministerio Publico.
E solucion ta hopi simpel y e ta den man di un solo persona: e minister en cuestion. Contesta
e preguntanan. Entrega e documentacion. Kita e duda.
Parlamento no lo stop di haci pregunta paso e ta incomoda un mandatario. Si nos acepta awe
cu un minister no mester contesta ora e pregunta bira incomodo — kico nos ta acepta pa
mañan? Parlamento tey pa percura cu pueblo di Aruba tin un gobierno cu ta duna cuenta, y
esey nunca lo bira negociabel.