“Pa aeropuerto y HOFA nan no a pidi nos opinion. Pakico awe, diripiente, nos ‘gevoelens’ ta importante?”
Ora Gobierno a haci excepcion riba LNT pa director di aeropuerto, no a consulta Parlamento ningun momento. Ora Rijkswet HOFA a sigui su proceso pa Rijksministerraad, segun parlamentario di PPA, Eduard Pieters, Parlamento tampoco a haya oportunidad pa duna su opinion prome.
Pero awe, cu Gobierno kier cambia Landsverordening Normering Topinkomens (LNT), Gobierno ta tuma curashi pa para dilanti Parlamento pa puntra: kico ta boso ‘gevoelens’? Pa Pieters, e contradiccion aki ta demasiado grandi pa ignora y ta parce mas cu ta burla di Parlamento.
Ora Gobierno no mester Parlamento
Pieters a trece e asunto di HOFA directamente den e debate como ehempel. Segun Pieters, Gobierno no a bin Parlamento prome pa busca su opinion tocante e Consensusrijkswet HOFA, manera a acorda na un IPKO. A djis informa Parlamento cu e proposicion ya a bay pa Rijksministerraad.
E mesun pregunta Pieters ta pone riba LNT, unda Gobierno anteriormente a autorisa un excepcion pa remuneracion di CEO di Aruba Airport Authority. Pero tampoco a consulta Parlamento prome.
“Parlamento no ta un stempel”
Pa PPA, aki ta e problema fundamental. Gobierno no por pasa riba Parlamento, ora ta trata di e decisionnan sensibel y despues kier busca su respaldo, ora e mester cambia ley.
“Nos no ta aki pa wordo uza solamente ora ta conveniente pa Gobierno.” Pa Pieters, Parlamento no ta un stempel politico pa legitima e decisionnan cu Gobierno ya kier tuma. Ta un organo democratico, cu tin responsabilidad pa controla Gobierno.
Ken ta bay cobra mas?
Pieters su preocupacion principal ta proposicion number 4 den e proposicion di Gobierno AVP-FUTURO pa revision di LNT: introduccion di un normering diferencia y op maat, teniendo cuenta cu situacion regional.
Pero PPA kier sa kico esaki ta nifica concretamente. Ken ta bay beneficia? Cua director? Cua entidad? Con e salario lo wordo calcula y ken lo determina e suma? Ki criteria lo tin? Con y ken lo percura pa e normanan?
Pieters ta cuestiona tambe kico Gobierno ta nifica cu “region”. “Na cua region nos ta compara?”
Caribe? Hulanda? Merca? Pa Pieters, Parlamento no por aproba un concepto sin conoce e criterio cu despues lo determina cuanto un funcionario halto por cobra.
Kico ta pasa cu e institutonan vital?
Pieters a menciona ATA y Banco Central di Aruba como e institutonan cu tin un posicion particular y cu mester competi internacionalmente pa e profesionalnan.
E kier sa cua compania estatal, entidad of funcion, Gobierno tin na mente pa eventualmente cay bou e sistema nobo. P’esey PPA ta exigi un lista y claridad total, prome cu expresa cualkier opinion positivo.
Transparencia prome cu “gevoelens”
Pa Pieters, Gobierno no por pidi Parlamento un opinion abstracto sin bisa Parlamento kico e cambio realmente lo produci. “Prome cu nos duna cualkier sentimento positivo, nos kier transparencia total. Con a evalua e LNT? Ken ta bay cobra mas? Pa ken esaki ta? Y pakico?”
E debate, pues, no ta solamente riba salario. Ta riba con Gobierno ta trata Parlamento.
Pasobra si opinion di Parlamento ta importante, e no por ta importante solamente ora Gobierno mester un “si”. Parlamento no ta un stempel. Parlamento t’ey pa controla Gobierno, specialmente ora Gobierno ta prefera pa no wordo controla.