Den cuadro di su participacion na High-Level Week di e di 81 Asamblea General di Nacionnan Uni, Minister di Husticia, Integracion, Transporte Publico y Energia, mr. drs. Arthur Dowers, a atende e apertura oficial di e prome Oficina Permanente di Observado di Conseho di Europa cerca di Nacionnan Uni na New York. Durante e ceremonia di apertura, Minister Dowers tabatin un encuentro cu Alain Berset, Secretario General di e Conseho di Europa cu desde september 2024 tin e encargo aki.
E apertura oficial a tuma luga dia 21 di september y a reuni diferente representante y invitado di alto nivel. Cu e presencia permanente nobo na New York, Conseho di Europa ta busca pa fortalece dialogo y cooperacion cu Nacionnan Uni, otro organisacion internacional y paisnan partner, particularmente den area di derechonan humano, democracia y Estado di Derecho.
Minister Dowers a participa na e evento hunto cu Minister Plenipotenciario di Aruba na Washington, Sra. Zulema Dabian-Erasmus, y Juri Nicolaas den su funcion como Director di Directie Buitenlandse Betrekkingen (DBB).
Durante e ocasion, Minister Dowers tabatin un encuentro tambe cu Su Eminencia Cardenal Pietro Parolin, Secretario di Estado di Santa Sede, kende tabata entre e invitadonan di alto nivel presente na e apertura.
E evento a brinda tambe oportunidad pa mantene contacto cu diferente representante internacional y pa sigui fortalece relacionnan den un ambiente caminda dialogo y cooperacion internacional ta central.
Pa Aruba ta importante pa uza e oportunidadnan cu High-Level Week ta brinda pa mantene contacto, construi relacionnan y sigui posiciona nos pais den dialogo internacional.
Participacion di Minister Dowers na e actividadnan na New York ta forma parti di presencia di Aruba den delegacion di Reino Hulandes durante High-Level Week di Asamblea General di Nacionnan Uni.
