Directorado di Planificacion y Desaroyo di Entidad Publico Boneiro a tene un sesion di informacion pa arquitectonan y companianan di construccion cu regularmente ta entrega peticion pa permit di construccion. Durante e encuentro e presentenan a haya explicacion tocante e sistema digital nobo cu ta drenta na vigor dia 5 di oktober.
Durante e sesion a explica paso pa paso con aworo mester entrega un peticion pa permit di construccion digitalmente. E participantenan a haya un demonstracion di e proceso di peticion. Tambe a explica cual ta e informacion y e documentonan cu ta necesario pa entrega e peticion den un forma completo.
Durante e encuentro tabatin espacio pa pregunta y feedback. E arquitectonan y e companianan di construccion cu tabata presente regularmente ta entrega peticion pa permit di construccion na nomber di nan clientenan. A base di nan experiencia nan por a comparti varios punto di atencion y haci pregunta tocante e sistema nobo di traha.
Directorado di Planificacion y Desaroyo a scohe pa organisa un sesion cu e grupo aki prome. Esaki pasobra e sistema di traha digital nobo tin influencia directo riba e manera cu nan ta prepara y entrega peticion pa permit di construccion. Di e manera aki nan por prepara na tempo pa e cambio.
For di 5 di oktober 2026 mester entrega peticion pa permit digitalmente via website di Entidad Publico Boneiro. Esaki ta conta pa tur hende cu kier haci peticion pa un permit di construccion, tanto hende particular como compania.
Pa duna hende particular tambe cu ta haci peticion un bon preparacion, directorado di Planificacion y Desaroyo den e periodo binidero via diferente canal lo duna explicacion tocante e sistema di traha digital nobo. Den esaki por haci uso entre otro di video di instruccion. Mas informacion tocante esaki ta sigui despues.
