Riba djasabra 26 di sèptèmber Tourism Corporation Bonaire (TCB) eksitosamente a selebrá e último evento di Taste of Bonaire di e aña akí na Isidel Beach Park. E Edishon Turismo a tuma lugá den kuadro di Luna di Turismo i a trese habitantenan i bishitantenan huntu pa un anochi kaminda a selebrá Boneiru su sektor turístiko, su kultura, su gastronomia i su farándula.
E evento a konta ku un programa vibrante ku hopi músika i presentashon, kaminda Grupo Kariño, Palu Grandi i DJ Marv e entretené e públiko durante henter anochi. Brassband The Boyz tambe a kontribuí na e ambiente festivo, di manera ku e último Taste of Bonaire di e aña akí a bira un fiesta inolvidabel.
E wéspetnan a disfrutá di un variedat di plato lokal i internashonal di e bendedónan di kuminda ku a partisipá, di manera ku nan a haña oportunidat pa eksperensiá e oferta kulinario variá di Boneiru.
Un otro punto kulminante di e anochi tabata anunsio di e ganadónan di e ‘Tourism Scavenger Hunt’, e spùrtògt turístiko di TCB, ku a tuma lugá dia 19 di sèptèmber na Rincon. E aktividat akí a enkurashá e partisipantenan hóben pa eksplorá e bario, deskubrí su karakter úniko i siña mas tokante un di e komunidatnan históriko di Boneiru.
E ganadónan ta:
Promé lugá: Grupo Maishi Chikí (lider Xavier Janga)
Di dos lugá: Grupo Papaya (lider Marjolijn Kroon)
Di tres lugá: Grupo Shimaruku (lider Xioella Janga)
Mihó trahe kreativo: Grupo Yambo (lider Xiomara Janga)
E Edishon Turismo a sirbi komo klousura di e eventonan di Taste of Bonaire di TCB pa aña 2026. Ku esaki e Luna di Turismo a finalisá den un forma festivo i esaki a destaká tambe e hopi eksperensianan, personanan i empresanan ku ta kontribuí na Boneiru su sektor turístiko.
