Silencio di Gobierno ta stanca leynan di Ombudsman y Studielening
Parlamentario Edgard Vrolijk ta haci un apelacion urgente na Gabinete
Eman pa cumpli cu su obligacion constitucional di duna contesta na Parlamento.
Actualmente, dos (2) iniciativa di ley di sumo importancia pa e estado di derecho y e futuro
di nos hubentud ta keda completamente stanca debi na e silencio y inaccion di e ministernan
responsabel.
Segun Parlamentario Vrolijk, e tardansa aki no solamente ta stroba e funcion di control y
legislacion di Parlamento, sino cu e ta perhudica directamente e ciudadanonan y e hoben
profesionalnan cu ta spera reformanan structural.
1. Ancramento di Ombudsman den Constitucion
E prome iniciativa di ley ta busca pa ancra e Instituto di Ombudsman den Constitucion di
Aruba como un organo halto di Estado, na mesun nivel cu Raad van Advies y Algemene
Rekenkamer. E paso aki ta busca pa garantisa su independencia structural, proteha e
ciudadano contra mal gobernacion y fortalece e marco democratico conforme standardnan
internacional.
Actualmente, e proceso aki ta completamente stanca:
Inaccion di Prome Minister: Ta wardando pa mas di nuebe (9) luna riba e posicion y
opinion oficial (zienswijze) di Prome Minister Mike Eman. E falta di respuesta aki ta
stroba Parlamento di por avansa y cumpli cu su funcion legislativo.
Sosten di Parlamento: E siguiente paso den e proceso ta pa midi e sentimento
(gevoelens) di Parlamento den Comision Central. Vrolijk ta enfatisa cu si e propuesta
no haya e sosten minimo necesario, e proceso lo para eynan mes. Sinembargo, pa
Parlamento por evalua e asunto debidamente y tuma e decision final aki, e contesta y
posicion oficial di Prome Minister ta un paso fundamental cu mester bin prome.
2. Ley di Kwijtschelding di Studielening
E di dos iniciativa di ley, e Landsverordening studieleningen, ta propone un modernisacion y
reformacion integral di e sistema di prestamo di estudio. E propuesta aki ta introduci un
kwijtschelding) di 50% pa e graduadonan, beneficiando tanto e hobennan cu a keda studia na
Aruba mes, como esunnan cu a studia den exterior y a regresa bek pa traha y aporta na e
desaroyo socio-economico di nos pais.
E ley aki tambe ta enfrenta obstaculo di parti di Gobierno:
Falta di contesta di e Gabinete: Tin mas di tres (3) luna wardando riba e contestanan
oficial di e ministernan Wendrick Cicilia, Gerlien Croes y Geoffrey Wever. E
inaccion aki ta stanca un iniciativa di ley crucial cu ta busca pa duna un alivio
financiero substancial y oportunidadnan igual na nos hoben profesionalnan.
Fin na discriminacion: Vrolijk ta remarca cu e ley aki ta fundamental pasobra e ta
elimina e discriminacion cu ta existi actualmente contra e studiantenan cu ta scoge pa
haci nan estudio superior na Aruba mes. E propuesta aki ta garantisa cu tanto e
studiantenan local como esunnan cu a studia den exterior ta ricibi e mesun incentivo y
beneficionan financiero.
Conclusion y Exigencia
E actitud di e ministernan pa no contesta e preguntanan oficial aki, ta tranca e proceso
democratico y legislativo di nos pais. Como iniciador di e dos leynan crucial aki,
Parlamentario Edgard Vrolijk ta exigi pa e ministernan manda nan contestanan di inmediato.
Mester permiti cu e tratamento den Comision Central y den sala di Parlamento por continua
sin mas tardansa, pasobra e progreso y bienestar di Aruba no por keda warda. Parlamento
mester por haci su trabou; inaccion di gobierno no por keda stanca e progreso cu nos
ciudadanonan merece.