A duna inicio na e curso di e Deporte Baseball 5, cu tin como instructor 2 profesional di “World Baseball Softball Confederation” (WBSC). Pa e curso aki ta conta cu Pablo Leone y Andrea D’Auria cu ta bishita tur pais cu ta miembro di WBSC y ta capacita e federacionnan local pa asina por tin instructor y entrenadornan di Baseball5. E curso aki a ser organisa a traves di IBiSA, hunto cu Comite Olimpico Arubano (COA) y WBSC.
E curso aki ta conta alrededor di 25 cursista, unda ta mira un gran cantidad cu ta docente di movecion y salud, hunto cu e instructornan di IBiSA y miembronan di e federacionnan local Aruba Baseball Association (ABBA) y Aruba Softball Bond (ASB). E grupo aki lo ta encarga pa asina desaroya y promove e deporte di Baseball 5 na scolnan basico y pa e comunidad en general. Baseball5 lo ta parti di e deportenan den Weganan Escolar ademas di a bira parti di e programa di e Weganan Interinsular, cuminsando cu e Weganan na Boneiron na inicio di 2027.
Hunto cu e instructor di Baseball5, ta conta cu presencia di Victor Isola (liaison di Americas pa WBSC) y Marco Ienna (Chief Operating Officer WBSC), cu a bin Aruba pa e curso, pero mas importante aun pa reuni cu federacionnan local di Baseball y Softball pa asina yuda desaroya e maneho di e deportenan. Como parti di WBSC tambe a conta cu Randolph Oduber cu ta forma parti di e ekipo di di Aruba cu ta traha e desaroyo di Baseball5 na Aruba.
COA ta contento pa mira e deporte di Baseball5 ta haya atencion, como e ta un deporte hopi accesibel y ta rekeri poco material y tereno, un combinacion ideal pa usa como deporte recreativo na scolnan y den barionan. Banda di esaki,e ta un disciplina deportivo cu ta wordo hunga Internacionalmente y pronto lo ta riba e programa di Weganan multideportivo. Ta desea WBSC y tur cursista hopi éxito durante e proximo 3 dia di curso, y cu esaki ta e prome paso den un Aruba cu ta hunga Baseball5 den cada skina di nos isla.
