Aruba Tourism Authority (A.T.A.) ta reafirma su compromiso cu un destinacion sigur, atractivo y di calidad
pa residente y bishitante, mediante su apoyo na e Downtown Oranjestad Security & Safety Initiative.
Centro di Oranjestad ta e curason historico y comercial di Aruba. Inversion den siguridad y proteccion den
e area aki ta esencial pa sostene revitalisacion den centro, apoya economia local y mantene Aruba su
reputacion como un destinacion sigur y atractivo. E sistema di camara y speaker (public-address system)
ta yuda cu prevencion di incidente, intervencion mas lihe ora tin situacion critico y ta contribui na
comunicacion efectivo cu publico ora ta necesario.
Pa A.T.A., siguridad den area publico ta un elemento esencial pa e experiencia total di destinacion Aruba.
Un centro sigur ta contribui no solamente na bienestar di residente, pero tambe na confiansa di bishitante.
A.T.A. a brinda apoyo na e iniciativa aki resultando den provision di e material y instalacion.
Tocante Downtown Oranjestad Security & Safety Initiative
E iniciativa a wordo lidera pa Oranjestad Business Improvement Zone (OBIZ), den colaboracion cu A.T.A.
y Gobierno di Aruba. Recientemente a completa e implementacion di e sistema nobo di camara di
seguridad y speaker (public-address system) na varios punto strategico den centro di Oranjestad.
E proyecto a wordo ehecuta pa Prorisk Security Management N.V., tambe conoci como Bossi Security,
den estrecha colaboracion cu negoshi y comerciantenan di centro di Oranjestad. E sistema ta inclui 41
camara di seguridad nobo, 10 speaker publico conecta na red y integracion cu infrastructura existente. Tur
e sistema ta conecta cu un Monitoring Center cu ta funciona 24 ora pa dia, 7 dia pa siman.
E iniciativa a wordo implementa den cooperacion cu Cuerpo Policial Aruba (KPA), cu ta aprecia e
contribucion positivo na reforsamento di siguridad y proteccion den e centro di Oranjestad.
Cu su apoyo na e iniciativa aki, A.T.A. ta sigui traha activamente cu partnernan publico y priva pa eleva
calidad di bida, reforsa siguridad di destinacion y sigura cu Aruba ta permanece un luga unda siguridad y
hospitalidad ta bay man den man.
