Despues di un proceso largo di mas cu un aña, e acusacionnan serio den direccion di e parlamentario Mike de Meza a resulta den loke su defensa ta describi como un asunto insignificante. Abogado sra. Desirée Croes a confirma cu Ministerio Publico (OM) a acerca nan pa un asina yama ’tomzitting’ (un cita cu fiscal), caminda a presenta un oferta pa un areglo pa asina termina e caso penal aki definitivamente.
Segun sra. Croes, e situacion aki ta un cambio drastico for di e inicio di e investigacion. E caso a cuminsa cu acusacionnan increibel manera fraude, labamento di placa y otro cosnan grandi. Awor, e realidad ta cu tur cos a baha na simplemente un kruisje (un fayo formal) bini un hoki robes, e abogado a splica.
Oferta di areglo riba mesa
OM tin un propuesta riba mesa pa nos, y awor ta keda na e cliente pa dicidi kico lo haci cun’é,” Croes a declara, agregando cu esaki ta un materia cu nan lo sinta analisa den e dianan binidero.
Di un olifante a bira un fruminga chiki
Describiendo e trayecto di e ultimo aña, sra. Croes a enfatisa e impacto y e esfuerso cu e defensa mester a hiba. El a splica cu nan mester a acudi corte na diferente ocasion y cu nan mester a exigi y bringa pa cada paso den e proceso pa por haya claridad.
Di tur e grupo grandi di acusacion cu nos por a mira por fin den e denuncia despues di un aña e ‘olifante’ ey a bira un fruminga chikito,” e abogado a ilustra formalmente.Tur e cosnan grandi cu a bini cun’é a resulta den nada formalmente.
Sin daño pa Pais Aruba
E abogado a enfatisa cu for di e propio sala di corte a keda demostra cu Sr. de Meza no tin ningun debe di impuesto (belasting) atrasa y cu no tabatin ningun fayo grave den e sentido ey. Croes a sigura cu e fayo ta debi unicamente na un entrega laat di e registracionnan of declaracionnan, un asunto cu den transcurso di tempo a keda completamente fecha y regla.
Sr. de Meza no tin ningun culpa den e locual tabata pasando, y a keda demostra cu e la cumpli cu tur cos. Pais Aruba no a perde ni un placa den e asunto aki, y no tabatin ningun mal intencion,” Croes a subraya.
Por ultimo, e abogado a remarca cu e tipo di fayonan administrativo aki di entrega declaracion laat por pasa cualkier ciudadano ordinario sin mayor consecuencia, pero cu den e caso di un persona publico manera Sr. de Meza, esaki a keda magnifica, transformando un fayo chikito den un problema aparentemente grandi pa e opinion públiko.
comunicado di prensa di gobierno di AVP-FUTURO