Durante e seshon plenario di e Konferensia Internashonal di Trabou (ILC), ku a tuma lugá djamars 10 di yüni último den Palasio di Nashonnan na Ginebra, Suisa, Raul Henriquez, Direktor i Sekretario General di Konseho Sosial Ekonómiko (SER) di Kòrsou, a lansa un yamada fuerte pa akshon global pa di un manera akselerá i koordiná kontrarestá e múltiple krisisnan riba tereno ekonómiko, geopolítiko i klimatológiko. Henriquez, ku a representá presidensia di e Asosiashon Internashonal di Konsehonan Ekonómiko i Sosial i Institushonnan Similar (AICESIS) – ku aktuálmente ta den man di SER di Kòrsou – a enfatisá e nesesidat urgente pa un respuesta internashonal determiná.
“Nos ta reuniendo na un momento krusial, marká pa desaroyonan ekonómiko instabil, dinámikanan geopolítiko kompliká i krisis klimátiko kresiente,” segun Henriquez. “E desafionan aki ta amplia desigualdat i ta un menasa serio pa stabilidat i pas mundial.”
E representante di e presidensia aktual di AICESIS a enfoká durante su diskurso riba pronóstikonan alarmente di, entre otro, Organisashon Mundial Meteorológiko (WMO), ku ta premirá ku un probabilidat haltu, ku temperatura mundial lo yega nivelnan sin presedente den e próksimo sinku añanan. Seguidamente e la referí na pronóstikonan di Fondo Monetario Internashonal (IMF), ku ta vislumbrá un desaselerashon ekonómiko global severo – refleho di vulnerabilidat ámpliamente eksistente. Den konteksto di e desafionan aki, Henriquez a enfatisá e importansia di promové “trabou digno” – trabou ku ta garantisá dignidat, igualdat, seguridat i derechonan fundamental. Esaki ta di akuerdo ku e normanan establesé pa Organisashon Internashonal di Trabou (ILO) i ta esensial pa resiliensia sosial i stabilidat global.
Henriquez a resaltá tambe e kontribushon vital di konsehonan sosial ekonómiko i órganonan di dialógo sosial den gobernashon inklusivo. E tipo di órganonan aki ta sirbi komo plataformanan strukturá pa dialógo entre gobièrnu, dunadonan di trabou, trahadonan i sosiedat sivíl. “Konsehonan sosial ekonómiko ta integrá hustisia sosial den polítika ekonómiko i nan ta dirigí transishonnan digital i medioambiental na un manera responsabel, i ta protehá komunidatnan vulnerabel di forma efikas”, Henriquez a splika.
Refiriendo na e ekonomista renombrá Mariana Mazzucato, e representante di e presidensia di AICESIS a boga pa un kambio den strategia ekonómiko: di drechamentu di merkado (‘market fixing’) pa formashon di merkado (‘market shaping’), i for di balor ekonómiko pa balor públiko ku un impakto sosial. Segun Henriquez, e tipo di órganonan aki tin un ròl klave den aliniashon di maneho públiko ku resultado sosial sostenibel, i no ku mira pa solamente interesnan komersial riba término korto.
Na klousura di su diskurso, Henriquez a hasi un yamada fuerte na estadonan miembro di ILO pa duna sosten i rekonosementu firme na konsehonan sosial ekonómiko komo motor pa desaroyo sostenibel i inklusivo. Siguiendo e yamada di Sekretario General di e Nashonnan Uní, António Guterres, e la reafirmá ku: “E krisis klimátiko ta un kareda ku nos ta pèrdiendo — pero ku nos por gana,” i e la insistí riba akshon kolektivo internashonal inmediato mediante diálogo kontinúo i kolaborashon.
“E momentu krusial aki ta eksigí union i determinashon,” Henriquez a konkluí. “Nos mester traha huntu pa krea un herensia hustu, sostenibel i duradero pa futuro generashonnan.”
