Gezaghèber interino Oleana a hasi un bishita na Hulanda pa hiba diferente kòmbersashon ku instansianan importante.
Durante su bishita el a hiba kòmbersashon ku ministerio di Asuntunan Interno i Relashonnan den Reino, ministerio di Enseñansa, Kultura i Siensia, ProDemos i un instituto di enseñansa pa papia tokante lantamentu di un formashon pa siensia atministrativo na nivel di ‘bachelor’ pa empleadonan públiko.
Importansia di e formashon pa mehorashon di servisio di gobièrnu na nos isla
E intenshon tras di e formashon akí ta pa mehorá kalidat di asesoramentu i ehekushon den gobièrnu na nos isla.
Deliberashon ku sekretario di estado Alexandra van Huffelen
Un di e partnernan di kòmbersashon tabata sekretario di estado Alexandra van Huffelen di Relashonnan den Reino. E deliberashon a enserá entre otro e desaroyonan na nos isla i e akuerdo atministrativo. Gezaghèber interino Oleana a eksperensiá e kòmbersashonnan komo hopi positivo, ku hopi perspektiva pa kolaborashon i progreso.
Bishita na Pro Demos: Oportunidatnan edukativo pa demokrasia
Sr Oleana a hasi un bishita tambe na ProDemos, e ‘Kas pa demokrasia i estado di derecho’. El a papia ku direktor Eric Stokkink tokante e posibilidatnan pa kuminsá ku programanan edukativo di ProDemos na Boneiru. E meta ta pa na un manera fásil laga alumnonan di skol sera konosé ku e reglanan di demokrasia.
