E preparashonnan pa Dia di Boneiru a ranka sali ofisialmente, i ya kaba henter nos isla ta sinti e ambiente di fiesta. Promé nos banderanan orguyoso di Boneiru tabata duna nos kayanan koló, i awor tur kaminda e banderanan chikitu i dekorativo ta waya reflehando e tema di e aña akí: ‘Nos ta Boneiru’.
E tema akí ta drai rònt di e manera ku nos ta ekspresá nos orguyo pa ken nos ta. Un boneriano bo ta rekonosé na su hospitalidat kaluroso, e rèspèt profundo ku e tin pa naturalesa i tradishon i su sentido komunitario fuerte. Esaki ta loke ta hasi nos úniko i ta konektá nos ku otro.
Riba e banderanan chikitu spesial por lesa algun frase for di nos himno, komo homenahe na nos patrimonio. Manera: ‘Maske chikitu ku su defekto, nos ta stimele ariba tur kos’. Palabranan ku fuertemente ta suprayá nos konektividat, nos amor i nos orguyo pa nos isla.
Nos ta invitá tur hende pa huntu nos plama e mensahe akí: saka un potrèt ku un di e banderanan chikitu, kompartí esaki riba medionan sosial ku e hashtag #NosTaBoneiru i konta dikon abo ta orguyoso di Boneiru.
‘E aña akí tur kos ta drai rònt di un sentido di solidaridat i orguyo,’ segun e Komishon di Dia di Boneiru. ‘Nos ta invitá tur hende pa partisipá, pone dekorashon i konhuntamente laga tur hende mira ku Boneiru ta biba den nos kurason, den nos kayanan i den nos komunidat.’
Laga nos selebrá huntu ken nos ta. Nos ta Boneiru!
