E temporada halto di crucero normalmente ta core di october te cu april, sin embargo den e temporada abao aki toch tabata tin bastante crucero cu a bishita Corsou. Esaki a trece cune un fluho rasonabel di turista diamars tabata tin 2 crucero mara na Mega Pier cu hunto a trece mas di 8.400 bishitante pa conoce nos dushi Corsou.
E crucero Enchanted Princess tabata tin 4.000 turista a bordo mientras e Carnival Vista a trece un total di 4.500 turista. Segun e itinerario di e cruceronan, den e siguiente 3 lunanan Corsou lo ricibi por lo menos 48 crucero mas na nos Mega Pier.
Segun cifranan obteni di Curaçao Port Authority (CPA) den nan publicacion pa e prome parti di 2025, Corsou a ricibi 185 barco crucero di januari te juni 2025 un total di 474.572 pasahero di barconan crucero cu a yega nos isla. E autoridad portuaria ta enfatisa cu turismo crucero di Corsou lo sigui crece.