‘Den e bario di Fleur de Marie cu ta pega cu Scharloo a bin ta experencia un aumento excepcional di prostitucion ilegal cu ‘casnan di cita’ ilegal y e problemanan social cu esaki ta trece cune’ asina Sra Maghalie van der Bunt-George a expresa. Despues di e cierre definitivo di Campo Alegre na aña 2020 e situacion solamente a bay di malo pa pio den e bario.
Segun e representante di e bario, antes tabata tin prostitucion ta pasa den e periferia pafo di e
bario ariba Scharlooweg sin embargo esaki a sufri un cambio y a schuif bay mas paden di Fleur
de Marie. E movecion di actividad aki pa e parti paden di e bario a cuminsa bira un molester pa
famianan cu tin añanan ta habita e zona y tin famia cu yiunan tin biaha chikito cu mester biba den
e situacion aki.
Van der Bunt-George ta sigui bisa cu hopi biaha ta trata aki di muhenan stranhero cu posiblemente ta ilegal, cu ta eherciendo e ofishi di mas bieu di mundo, bao circunstancianan penoso y a-hygienico. Aparte di esey a cuminsa uza algun cas den e bario pa e damanan haci nan trabao, pero den condicionnan deplorabel caminda ta parti un cas den diferente camber caminda 1 cama so por drenta den dicho camber.
E situacion ta mas fastioso ainda si analisa cu segun CBS su ultimo estadisticonan, Scharloo
bao cual Fleur de Marie ta cay, ta un di e zonanan cu mas pobreza na Corsou. Esaki ta trece
cune cu por uza e hecho di pobreza entre habitantenan pa practicanan ilegal. Habitantenan ta
keha cu tin diferente homber nan desconoci y grosero ta pidi nan pa servicionan sexual, cual ta
denigrante pa un habitante drechi di e bario.
Bisiñanan tambe ta keha cu anochi tin muziek duro y desordo , sushedad y un sentimento di insiguridad den Fleur de Marie. Hubentud di e bario tambe tin di biba dia y nochi ta wak e practicanan aki, cu tur consecuencia cu nan por tin ariba e hobennan. December habitantenan a manda un carta pa mandatarionan unda nan a splica e situacion, pero ainda nada no a wordo haci.