Tourism Corporation Bonaire (TCB), huntu ku Entidat Públiko Boneiru i Bonaire International Airport (BIA), a yama bon biní na e promé buelo di Air Century ku a yega Boneiru dia 9 di yüli 2025. E avion a risibí un saludo ku bandera, siguí pa un evento di selebrashon na aeropuerto.
Air Century lo operá un buelo semanal i temporal riba djárason entre Boneiru i Repúblika Dominikana, konektando Aeropuerto Flamingo ku Aeropuerto Internacional La Isabela na Santo Domingo. E inisiativa akí ta no solamente mehorá e konekshon regional ku tarifanan aseptabel, sino tambe ta ampliá e posibilidatnan di biahe pa turistanan i esnan ku ta bai bishitá famia i amigu. La Isabela ta un destino nobo pa Boneiru, i su lokalidat kumbiniente den Santo Domingo ta dun’é mas balor. Ku e tarifanan kompetitivo di Air Century, e ruta ta bira un opshon atraktivo i aksesibel pa mas hende.
Varios agensianan di biahe di Repúblika Dominikana tabata den e vuelo akí tambe, un oportunidat balioso pa nan siña konosé Boneiru direktamente. E bishita akí a duna nan e chèns pa eksplorá e aktividatnan, alohamentu i e ofertanan úniko ku Boneiru tin, pa nan por promové i bende e isla na nan klientela bek na nan país. Tambe representantenan di Konsulado Dominikano tabata presente. Si nos wak e kantidat di hende ku a ‘check in’ awe, ta parse ku e buelo tin un gran okopashon, indikando ku e ruta ta bon risibí i ta generá interés grandi.
“E konekshon nobo akí ku Repúblika Dominikana ta marka e kuminsamentu di un kooperashon prometedor, un ku ta mehorá e aksesibilidat regional di Boneiru i ta krea oportunidatnan nobo pa turismo, komersio i biahe familiar,” segun Elesiër Angel, direktor di TCB. “Nos ta orguyoso pa yama Air Century bon biní na Boneiru i nos ta agradesido ku nan ta kere den nos isla. Aunke e ruta ta kuminsá temporalmente, nos tin konfiansa den su éksito riba término largu i e numeroso benefisionan ku e lo trese pa nos komunidat i pa henter región Karibense.”
“E lansamentu di e ruta temporal nobo ku ta konektá Aeropuerto Flamingo ku Aeropuerto La Isabela na Santo Domingo ta un paso importante mas den fortalesé e konekshon regional di Boneiru,” segun Maarten van der Scheer, direktor di BIA. “Ku e tarifanan kompetitivo di Air Century, nos ta kere ku e ruta lo habri oportunidatnan nobo pa biahe aksesibel pa nos komunidat lokal, sea pa vakashon, negoshinan òf pa reuní ku famia.”
Héctor Manuel Hernández Tiburcio, direktor di bentanan di Air Century, a bisa:
“Ta ku inmenso orguyo i emoshon profundo nos ta yama bon biní na e promé buelo di Air Century na e isla maravioso di Boneiru. E ruta nobo akí ta mas ku un konekshon geográfiko — ta un símbolo di nos kompromiso pa ekspandé frontera, fortalesé lasonan regional i habri porta pa turismo, negoshinan i interkambio kultural.”
“Awe ta marka e kuminsamentu di un bishita prometedor — uniendo Boneiru ku Santo Domingo dor di un ruta aéreo nobo ku ta bai mas ayá di loke ta kumbiniente. Ta un paso pa un Karibe mas konektá, kaminda oportunidat, kolaborashon i turismo multidestino ta pone fundeshi pa un desaroyo sostenibel i eksperensianan di biahe inolvidabel,” segun Carlos Rafael Jiménez Jáquez, Visepresidente Ehekutivo di Air Century.
Reservashonnan ya ta habrí pa e temporada di fiesta, i te ku dia 21 di yanüari 2026.
Pa mas informashon òf pa hasi bo reservashon, bishitá: www.aircentury.com
