Siguridad ta un prioridad constante, y pa Cuerpo di Bombero di Aruba, esaki ta nifica un vigilancia di 24 ora pa dia pa atende cualkier emergencia cu por surgi. Den un entrevista reciente, a resalta e importancia di e intervencion rapido y e variedad di situacionnan den cual nos bomberonan ta hunga un papel crucial pa salba bida y propiedad.
E trabou di bombero ta bay hopi mas leu cu simplemente paga candela. Nan ta e prome respondenan den situacionnan di peliger extremo, dunando asistencia unda cu e comunidad tin mester di nan mas.
Recientemente durante di semana santa , e central di alarma 911 a registra un total di 105 melding, di cual un parti significante tabata rekeri presencia di bombero. Entre e casonan mas destaca, por menciona:
- Candela di mondi: Un total di 7 incidente di candela den mondi a wordo atendi.
- Accidente di trafico: Bombero a interveni den 3 accidente di auto serio. Den e incidentenan aki, e personal mester a uza ekipo special pa saca personanan cu a keda pega den e vehiculonan, logrando rescata un señora den un situacion critico.
- Asistencia na Ambulans: Den 2 ocasion, a brinda yuda na personal di ambulance pa transporta pashentnan den situacionnan dificil.
Un di e logronan mas importante tabata e control di un candela den un cas abandona na Bernhardstraat y un incidente den un cushina na Burgerking. Den e ultimo caso aki, e sistema di alarma contra candela a hunga un rol determinante.
“Si bo no meld e incidente na tempo, ora bombero yega nan por haya un edificio completamente na candela,” e vocero a splica. Danki na e sistema di alarma na Burgerking, e bomberonan por a yega na tempo pa evita un tragedia mayor y paga e candela mas liher.
Cuerpo di Bombero ta enfatisa cu cada hogar mester tin un sistema di alarma contra candela. Esaki no solamente ta duna e personanan e chance di sali na tempo for di e cas, sino cu e ta permiti central 911 avisa e instancianan corecto mas rapido posibel.
Prevencion y un respuesta rapido ta e dos pilar nan cu ta haci e diferencia entre un incidente controla y un desaster. Nos bomberonan ta keda comprometi pa sirbi Aruba cu e mesun dedicacion y profesionalismo di semper, Asina vocero di Brandweer Francis Toussaint a declara.