Cruz Cora ta recorda Dia Internacional di, e organisacion y ta gradici su boluntarionan y a haci un yamada special na comunidad pa participa den nan evento anual di recaudacion di fondo, “Capes for a Cause”. E anochi di gala aki lo tuma luga dia 30 di mei proximo na e sede mes di Cruz Cora na Dakota.
Cruz Cora Aruba a probecha e ocasion di nan dia internacional pa manda un palabra di gratitud profundo na tur e boluntarionan cu ta dedica nan mes diariamente na e bienestar di comunidad Arubiano. Igualmente, e organisacion a gradici tur nan sostenedornan, patrocinadornan y amigonan cu ta haci e trabou humanitario aki posibel.
Evento ‘Capes for a Cause’
E aña aki, e di tres edicion di “Capes for a Cause” lo wordo realisa riba e propio tereno di Cruz Cora Aruba, situa na Pedro Gallego Straat 4 na Dakota. E evento lo cuminsa for di 7:00 pm y lo dura te cu 1:00 am, primintiendo un ambiente fenomenal cu presentacion di un banda en vivo y DJ Metropolis.
E meta principal di e anochi aki ta pa recauda fondo pa mantene y expande e proyectonan social di e organisacion cu ta brinda ayudo directo na e gruponan mas vulnerabel di nos isla.
Proyectonan cu bo contribucion ta sostene
Cu e compra di un ticket, e bishitante ta aporta directamente na programanan vital manera:
- Barica y Curason Contento: Un iniciativa cu ta brinda alimento na personanan adicto ambulante y esnan cu ta biba riba caya den centro di Oranjestad.
- Food Kitchen (San Nicolas): Un proyecto cu ta ofrece cuminda cayente tres biaha pa siman na personanan cu ta pasando den dificultadnan financiero.
- Back to School Haircuts: Caminda ta brinda corte di cabey pa muchanan prome cu aña escolar cuminsa, cu e meta pa nan drenta klas cu mas confianza den nan mes.
- Ayudo Social Diario: Asistencia continuo na famianan den necesidad cu ta acudi diariamente na Cruz Cora pa yudansa.
Tickets y participacion
E ticket pa e evento tin un balor di 375 florin pa dos persona. Esnan interesa den apoya e causa aki por adkeri nan ticket via e siguiente canalanan:
- Email: info@redcrossaruba.com
- Telefon: 582-2219
- Personalmente: Na oficina di Cruz Cora na Dakota.
E organisacion ta informa cu tin facilidad di pago via transferenca bancario, swipe of cash. Cruz Cora Aruba ta extende un invitacion cordial na henter e pueblo di Aruba pa forma parti di e bunita causa aki y asina contribui na e bienestar di nos comunidad.
