Diabierna ultimo, durante un reunion den Parlamento di Aruba, a wordo aproba cuatro mocion di diferente fraccion den parlamento relaciona cu maneho di cuido pa adultonan mayor. Segun Mervin Wyatt Ras, Minister di Salubridad Publico, Bienestar Social y Adiccion, gobierno a presenta un vision integral enfoca riba mehoramento di cuido pa nos grandi nan.
Cuido di adulto mayor como prioridad
Segun e minister, cuido di adultonan mayor ta un prioridad pa e coalicion Gobierno di Aruba AVP-FUTURO for di su inicio di gobernacion. Entre e medidanan inicial tabata un aumento di pension pa sostene poder di compra di e grupo aki, y reintroduccion di e “lista bek positivo” di medicamentonan, mientras cu actualmente ta sigui trahando riba optimalisacion di e maneho di salud.
E politica actual ta dirigi riba e principio cu mayoria di adultonan mayor mester por keda nan mes na cas, ricibiendo cuido den nan ambiente familiar. Na mes momento, gobierno ta fortifica e capacidad di casnan di cuido y servicio na Saba.
Exigencianan di calidad y supervision
Directie Ouderenzaken Aruba ta desaroyando un marco di exigencianan di calidad pa casnan di cuido. Segun e minister, ta importante pa haya mas supervision y control riba situacionnan cu ta surgi, pa asina garantisa un nivel di cuido adecua.
Actualmente ta trahando riba un nulmeting (medicion inicial) pa evalua situacion actual, y tin un meldpunt activo pa reporta caso di maltrato of abuso. E preocupacion no ta limita na maltrato fisico of mental, pero tambe financiero, unda cu den algun caso familiarnan por haci uzo indebí di fondo di e adulto mayor.
Inversion den facilidadnan
Gobierno a destina fondo pa amplia capacidad di cuido na Saba, cu un expansion di 20 cama adicional y 20 empleado extra. Tambe a inverti aproximadamente mei miyon florin pa fortifica Centro Kibrahacha, incluyendo mehoramento di transporte y expansion di facilidadnan, manera creacion di un helpline.
Ademas, gobierno a contribui na apertura di Pasadia Piedra Plat, cu a habri oficialmente dia 12 di februari. E facilidad aki ofrece cuido durante dia pa adultonan mayor, duna sosten na mantelzorgers (cuidadornan informal) cu ta combina trabou cu responsabilidad di cuido.
E modelo di pasadia ta permiti cu adultonan mayor pasa un dia completo den un ambiente seguro y social, pa despues regresa cas atardi. Segun e minister, esaki ta un instrumento importante pa preveni isolacion, depresion y problemanan di salud mental, mientras cu ta promoviendo bienestar y calidad di bida.
Ley pa cuido di largo duracion
Minister Wyatt Ras a confirma cu gobierno ta trahando riba un ley di cuido di largo duracion (“langdurige zorg”) cu lo crea un base structural pa financia sostenibel di e sector di cuido pa adultonan mayor. Asina e propuesta di ley ta cla, lo wordo presenta den Parlamento pa debate y aprobacion.
E minister a cera su intervencion cu un palabra di gradicimento na tur organisacion y profesionalnan cu ta contribui diario pa garantisa un bida digno y di calidad pa nos adultonan mayor.
