Konsehal Daisy Coffie Frakshon Coffie ta deseá pueblo di Boneiru un aña 2022 salú, plasentero i eksitoso. ‘Mi ta spera ku e aña akí ta trese tur kos ku ta hasi boso felis, tantu riba tereno privá komo riba tereno profeshonal. Riba tereno gubernamental mi ta spera ku aña 2022 ta bira un aña kaminda mas ku nunka desaroyonan deseá ta keda realisá. Akí mi ta pensa riba entre otro enseñansa ku un vishon klarito pa futuro, kombatimentu di pobresa, rekuperashon i kresementu ekonómiko, rehabilitashon di nos kamindanan loke mester kana man den man ku siguridat di tráfiko, mantenshon di nos propio kultura, atenshon pa deporte etc. Komo Frakshon Coffie mi ke sigui hasi mi trabou di representante di pueblo manera mi a hasié durante e aña ku ta tras di lomba. Mi ta konbensí ku esaki ta na bienestar di funshonamentu di Konseho Insular i di nos gobièrnu. Pa e motibu akí mi ta hasi un yamada na tur habitante di Boneiru pa tuma kontakto ku mi pa asuntunan ku mi por ta na boso servisio kuné’, segun Daisy Coffie.
Kontakto ku pueblo
Daisy Coffie no ta kere ku e por kumpli ku su tareanan di representante di pueblo sintá tras di un lèsenar den su ofisina. Al kontrario! Daisy Coffie ta duna gran balor na kontakto direkto ku abitantenan di Boneiru pa tende for di nan mes boka kiko ta nan deseonan i e problemanan i difikultatnan ku nan ta konfrontá diariamente. Un habitante por ta kana ku un idea, un inisiativa hopi kreativo ku por ta di gran importansia pa desaroyo di su bario i asta pa Boneiru kompleto. Loke e mester ta nèt un empuhe èkstra di gobièrnu di su isla, ku ta rekonosé ku idea di e siudadano akí ta kuadra ku maneho general di gobièrnu. Akinan ta kaminda ku e representante di pueblo por traha e brùg pa e idea akí yega serka e instansianan enbolbí. Netamente esaki konsehal Daisy Coffie ke logra ku su atendementu personal ku siudadanonan, loke a tuma lugá 53 biaha den e último kuartal di 2021 i tambe ku su bishitanan di trabou. Den e periodo akí Daisy Coffie a bishitá: Plenchi di Trabou, Kunuku Punta Gardon, SGB departamento di PRO (enseñansa práktiko), Museo Terramar, Bonaire Holding Maatschappij i
Sentro Médiko Rincon.
Maneho di gobièrnu
Un otro parti di trabou di un representante di pueblo ta kontrolá funshonamentu di gobièrnu. Esaki un konsehal ta hasi pa medio di pregunta durante reunion di Konseho Insular i pregunta por eskrito dirigí na (miembronan di) Kolegio Ehekutivo. Den e di kuater kuartal di 2021 konsehal Daisy Coffie a tene disertashon i hasi pregunta oral tokante Bonlab, ordenansa di awa shushi, desishon di toleransia relashoná ku Chogogo Resort, Covid-19 i Tienda pa Konsumidó. Pregunta por eskrito konsehal Daisy Coffie a hasi tokante falta di informashon pa Konseho Insular por funshoná, kosto di hasi negoshi na Boneiru i forsa di ehekushon di aparato públiko.
Reunion
Durante e di kuater kuartal di aña 2021 Daisy Coffie a asistí na 61 reunion repartí den reunion di presidio (3x), reunion di Komishon Fiho (22x), reunion di Konseho Insular di forma opinion (4x) i reunion di Konseho Insular di tuma desishon (7x). Ku gruponan informal konsehal Daisy Coffie a reuní 21 biaha. Banda di esei tabatin tambe 3 reunion di índole general i ku Komishon di Supervishon Finansiero (Cft) Daisy Coffie a reuní 1 biaha.