Recientemente, e Division di Servicio di Sosten pa Studiantenan (SSSD) a fungi como anfitrion pa un delegacion di dies profesional den siguridad escolar biniendo for di Antigua & Barbuda, Anguilla y St. Lucia. Durante e bishita di un siman, e delegacion a wordo ricibi pa e Honorabel Minister di Enseñansa, Cultura, Hubentud y Deporte, Sra. Melissa Gumbs, hunto cu e Secretaria General interino, Sra. Shermina Powell-Richardson.
Meta di e Bishita y Observacionnan den Campo
E obhetivo principal di e bishita tabata pa adkiri conocemento profundo riba e programa di siguridad escolar di St. Maarten. Durante e siman, e delegadonan a presencia un simulacro di emergencia medico na Asha Stevens Hillside Christian School y a bishita Sister Borgia School, kende a wordo nomina como e “Safety & Emergency Team (SET) of the Year 2024”.
E delegacion a keda masha impresiona cu e standards halto di siguridad. Nan a duna elogio special pa:
- E calidad di e simulacronan y e rapidez di e contesta di e scol.
- E involucracion activo di e studiantenan como “ambasadornan di siguridad”.
- E profesionalismo y claridad den e structura y funcionamento di e ekipo di emergencia (SET) na Sister Borgia School.
Intercambio di Conocemento y Experiencia
Sra. Olga Mussington-Service, Manager di SSSD y punto focal di siguridad escolar pa St. Maarten, a lidera e sesionnan di training. E temanan a cubri aspectonan crucial manera salud mental, sosten psicosocial, y e maneho di violensia y bullying den y rondo di scol.
“E intercambio tabata enriquecedor pa tur banda. Maske e delegadonan a bini pa siña di nos practicanan, nan tambe a comparti nan experienianan valioso,” Sra. Mussington-Service a declara.
Liderasgo Regional y Cooperacion
St. Maarten tabata Presidente di e “Caribbean Safe School Initiative” (CSSI) durante e periodo di 2022 pa 2025. Durante e Foro Ministerial di CSSI na mei 2025, St. Maarten a traspasa e presidencia pa St. Lucia. E bishita di trabou aki a nace precisamente despues cu St. Maarten a presenta su “best practices” durante e foro ey, locual a hala atencion di Antigua & Barbuda y e otro islanan bisiña.
E bishita aki ta subraya un di e obhetivonan principal di CSSI: uni e paisnan den Caribe pa comparti ideanan y experencia, brindando sosten mutuo den bienestar di e comunidadnan local y e region en general.