Di tres candidato: Gerlien Croes a dicidi pa bandona AVP

Awe den oranan di mainta tabatin rumoran persistente cu Gerlien Croes a tuma su retiro for di AVP. Esaki ta basa aparentemente riba un mensahe cu el a manda pa su campañadonan y cu finalmente a wordo manda full rond.

Tabata difícil pa haya Croes pa un comentario, ya cu e no tabata contesta mensahenan pa su celular. Sinembargo mas laat den dia e confirmacion a yega cu e candidato aki a kita su sosten di partido AVP. El a haci e anuncio aki den un declaracion breve dilanti di Parlamento.

Den su declaracion el a bisa cu manera priminti pueblo awe e ta anuncia su decision riba su futuro politico, despues di a pidi pueblo tempo. A dura tres siman, pero mi a tuma hopi tempo pa combersa den seno familiar y sostenedornan. Ta dificil pa yega na otro, el a bisa. E decision a bini net seis aña despues cu el a drenta politico. El a pidi pa cambionan drastico pa bini cu un otro pensamento den partido. Tin un division grandi den e partido den forma di wak topico y forma di hiba politica. Lastimamente mi no a wordo convenci cu tin cambionan drastico cu lo bini a corto plaso y mester a tuma un decision. Aruba ta pasando den situacionnan no facil, retonan cu Hulanda.

El a bisa cu e no por atacha su principionan. “Mi ta gradici tur esnan cu a forma parti di e deliberacionnan di e ultimo tres simannan. Mi ta convenci cu pueblo ta kere ainda den un aire fresco. Den e partido cu mi tabata forma parti di dje a duna hobennan luga prominente. Pero esey no ta suficiente, pasobra mester tin cambio den e contenido. Y esey mi no a sinti cu tin cambio den dje.”
El a bisa tur esaki prome cu el a confirma cu si el a retira di AVP.
Den e ultimo eleccion Gerlien Croes a logra haya mas cu 2 mil voto, den su di dos aparicion riba lista di AVP.

Candidatonan cu recientemente a tuma nan retiro for di partido AVP tabata Rycond Santos do Nascimiento, y despues Muzaninn Wever, yiu di e fayecido politico Mary Wever.