Aruba,
Masha pabien cu Dia Internacional di Idioma Materno!
Nos Idioma Papiamento,
cu ta centro di atencion awe,
merece nos respet, nos aprecio,
nos cuido, nos esfuerso pa sosten’e
den su lucha pa su existencia.
El a sobrevivi, contra tur espectativa colonial.
E t’ey, mas fuerte cu nunca.
Sinembargo, herida y poco manca.
Su exclusion for di enseñansa y otro sector di comunidad
a y te ainda ta perhudica desaroyo di hopi generacion.
Mundialmente ta reconoce y stimula idioma materno
como e miho base pa enseñansa exitoso.
Pa e aña aki UNESCO ta propaga mundialmente como tema
di Dia Internacional di Idioma Materno 2023:
“Educacion Multilingual – un necesidad pa transforma educacion”.
Educacion multilingual basa riba idioma materno ta facilita
acceso y inclusion na siñamento debido y cu sentido pa e alumnonan.
Esaki sigur ta conta pa Aruba tambe.
Nos alumnonan merece enseñansa den idioma comprendibel.
Pa gran mayoria esaki ta Papiamento, cu nan a lanta cu ne for di chikito.
Recientemente un alumno a expresa publicamente na Princesa Amalia:
‘Nos na Aruba ta inteligente. Si ami por a siña tur cos den mi propio idioma,
kisas lo mi tawata na VWO.’
P’esey, pa un enseñansa realmente sostenibel y di calidad,
Papiamento mester ta na prome luga.
Nos idioma materno ta importante
pa conoce nos mundo, mas idioma y nos mes,
pa desaroyo berdadero di nos pueblo, di nos pais.
Pueblo di Aruba, ta nos mes mester dun’e su balor! Ta di nos e ta!
Papiamento, nos idioma, nos derecho!